Сырттан жеткізілген қауында нитраттың нормадан тыс екені анықталды

Жаз мезгілінде жеміс-жидек, көкөніс өнімдерін сатып алғанда абай болыңыз! Шаһардың эпидемиолог мамандары осылай деп дабыл қағады. Тамыз айында Ресей мен республиканың оңтүстік өңірлерінен жеткізілген жеміс өнімдерінен алынған сынамаларда нитраттың нормадан тыс екені анықталды. Техникалық регламент талаптарына да сай келмеген қауындар дереу сатылымнан алынып тасталған.
Эпидемиолог мамандар тамыз айының басында Ресейден әкелінген қарбыз бен оңтүстік өңірлерден жеткізілген қауындарды зертханалық тексеруден өткізген. Зертханалық тексеру қауынның құрамында нитрат мөлшерінің тым жоғары екенін анықтаған. Қарбыз құрамы таза, сақталуы да талапқа сай екендігін көрсеткен. Статистикалық мәліметке сай, ақтөбеліктер арасында биылғы жазда жеміс-жидек, көкөніс өнімдерінен ұшыну жағдайы көп тіркелмеген. Әйтсе де мамандар кез келген өнімді сатып алар кезде жеуге жарамдылық мерзімін мұқият тексеруге кеңес береді. Шаһарда зертханалық зерттеуге өнімдер сауда желілерінен, ірі дүкендерден, базарлардан ғана алынады. Өнім сапасын тексертіп алған кәсіпкерлік субъектілеріне рұқсат құжаттары беріледі. Жабайы сауда орындары, жол жиегіндегі сатылып тұрған қауын-қарбыздың сапасына ешкім кепілдік бермейді. Қауіпті деп танылған қауын өнімдерінің барлығы саудадан алынды. Жеке кәсіпкерге ел аумағында санитарлық-эпидемиологиялық заңнаманы бұзғандығы үшін шара қолданылған. Айыппұл салынды. Айта кетелік, дүкендер мен супермаркеттерде, шағын сауда орындарында, базарларда өнімдердің шығарылған күні мен сақталу мерзімін мұқият оқып шығу өте маңызды. Өнімнің жарамдылық мерзімі өтіп кеткенін көрсеңіз санитар-эпидемиологтарға хабарласуға болады. Бірақ көп жағдайда ақтөбеліктер улану жағдайына қатысты құзырлы органдарға шағымдануға құлық танытпайтын болып шықты.
Количество показов: 708
Дата создания: 17.08.2022 18:14:47