"Ең үздік". "СНПС-Ақтөбемұнайгаз" АҚ қызметкерлерінің балалары арасында осындай атаумен өнер байқауы өтті. Бір апта бұрын басталған онлайн сайыс бүгін қортындыланды. Жеңімпаздар мен жүлдегерлер компания атынан бағалы сыйлықтармен марапатталды. Халықаралық балалар күнінде өзге қатысушылар да мерекелік сыйлықтиан құр қалмады. «CНПС-Ақтөбемұнайгаз» АҚ 20- мамырда өнерлі балаларды анықтайтын "Ең үздік" атты байқау ұйымдастырды. Балалар күніне арналған бұл жарыстың басты мақсаты дарынды балақайларды қолдау. Пандемияға байланысты шара онлайн өтті. Оған кәсіпорынның өңір бойынша 12 филиалынан 110 бала қатысты. Айта кету керек, сайысқа тек компания қызметкерлерінің балалары тартылды. Байқауға қатысушылардың бейнероликтері компанияның жастар кеңесінің инстаграм парақшасында жүктелді. Жас ерекшелігіне қарай әр топтан жеңімпаздар мен жүлдегерлер жинаған дауыс санымен анықталды. 1 апта бойы жүрген байқауда озып шыққандардың бірі Айлин Сатаева. 6 жасар Айлин жеңімпаз болғанына қуанышты. Ал оның анасы Шынар Сатаева кез келген ата-ана мұндай шарадан қалыс қалмауы керек, дейді. Себебі өнер байқауы қызының қабілетін ашып, шабыттандырған. Осындай мерекелік шара ұйымдастырған ұжымға Шынар Сатаеваның айтар алғысы шексіз.Жеңімпаздарға ақшалай сыйлықтан бөлек, сертификаттар мен түрлі бағалы тартулар табысталды. Байқауды «CНПС-Ақтөбемұнайгаз» АҚ-ның еңбек ресурстар бөлімі, басқарма аппараты және жастар кеңесі бірлесе ұйымдастырған. Алдағы уақытта компания басшылығы атынан осы сынды мәдени іс- шаралар жиі өткізілетін болады.