Бүгін қалада Абай ескерткіші ашылды. Осыған орай өткен салтанатты шараға өңір басшысы Оңдасын Оразалин қатысты. Ұлы ақынның 175 жылдық мерейтойы аясында сондай-ақ, "Нұр Отан" партиясының облыстық филиалында "Әдебиет.Рух.Қоғам" атты республикалық ғылыми-тәжірибелік форум өтті. Форумға Нұр-Сұлтан, Алматы, Семей қалаларынан ғалымдар қатысты.
Шаһарда Абай Құнанбаевтың ескерткіші ашылды. Қоладан құйылған еңселі ескерткіш Есет батыр көшесінде тұрғызылған. Туынды белгілі мүсіншілер Тоқтар Ермеков пен Жеңіс Жұбанқосовтар. Қос мүсінші соңғы екі жылда облыста бой көтерген Әйтеке би, Жалаңтөс Баһадүр, Бөкенбай батыр сынды тарихи тұлғалардың ескерткіштерінің авторы. Абай Құнанбаевтың 175 жылдық мерейтойына орай сондай-ақ, бүгін қалада әдебиеттанушы ғалымдар бас қосты. Жиналған ғалымдар шетінен қазақ әдебиеттану ғылымының майталмандары. 20-ға жуық ғалым "Әдебиет. Рух. Қоғам", "Аймақтық әдебиеттану мен мәдени мұра" тақырыптарының проблемалы тұстарына кеңінен тоқталды. Жиынға қатысқан өңір басшысы аймақтың әдебиет саласына оң бағасын берді. Форумда Абай Құнанбайұлының мұрасын ұлықтауға арналып, қаламгерлер арасында жыл бойы өткен сайыстың қорытындысы жарияланды. Драматургия, әдеби көркем аударма, поэзия, проза, сатира, баллада мен дастандар, балаларға арналған шығармалар жанры бойынша өткен республикалық жарысқа әр өңірден 100-ден аса еңбек қабылданған. Бүгін жеті номинация бойынша жеңімпаздарға 1 млн теңгелік сертификаттар табысталды.