Екінші және үшінші топтағы мүгедек бала 18 жасқа толғаннан кейін күтушісіз қалуы мүмкін. Себебі күтушілерге әлеуметтік ақы тек бала кәмелет жасына толғанға дейін төленіп тұрады. Бүгін дімкәс балалардың ата-аналары бас қосып, осындай мәселелерді талқылады. Әрқашан қасыңнан табылатын жандар үшін! Осындай тақырыппен қоғамдық тыңдау ұйымдастырған "Радуга" мүгедек балалары бар аналардың бірлестігі. Олар өз талаптарын Үкіметке жолдамақ. Өйткені 18 жастан асқан ақыл -есінде кемістігі бар немесе өзге де денсаулығында кінараты бар жастар қараусыз қалып жатыр. Екінші, үшінші топ мүгедектері кәмелет жасына толып кетсе, олардың асыраушыларына жәрдемақы төленбейді. Жәрдемақы бірінші топтағы мүгедектерге қамқор болатын адамдарға ғана үзбей беріледі. Бірақ жарымжан жандарды бағып-қағып отырған адам да зейнеткерлікке 60- тан асқанда шығады. Сондықтан бұл әлеуметтік түйткілді ретке келтіретін уақыт жетті, дейді бірлестік белсенділері. Жалпы Қазақстанда 700 мыңнан астам мүгедек жан өмір сүріп жатыр. Олардың жартысына жуығы екінші топтағы мүгедек. Осы екінші топтағы үш мүгедек адамның біреуі өздігінен жүріп- тұра алмайды. Ал оларды қамқорлығына алған адам да әлеуметтік қолдауға зәру. Олар біріншіден жәрдемақы ала алмайды, мүгедек бағып, үйде отырғандықтан зейнетақы қорына жарна түсіп тұрған жоқ. Сондықтан жасы жетіп, зейнеткерлікке шыққанда да ең төменгі зейнетақы алады. Мүгедек балаларды қолдау бірлестігінің өкілдері Қазақстан заңдарына сараптама жасалып, мәселе басқаша шешілуі тиіс деп есептейді