Бүгін Ақтөбеге жұмыс сапарымен үкімет басшысы Асқар Мәмин келді. Ол қаладағы бірнеше нысанды аралап көрді. Премьер-министр алдымен «Нұр Ақтөбе» ауданындағы тұрғын үй құрылысымен танысты. Мұнда 27 көпқабатты үй салынып жатыр. 3,4,5 қабатты үйлер келесі айда пайдалануға беріледі. 1340 пәтердің кілті табысталады. Өңірдегі тұрғын үй бағдарламаларының орындалу барысын қала әкімі Мавр Абдуллин айтып берді. Жоспар бойынша биыл облыста 1 миллион шаршы метр тұрғын үй пайдалануға беріледі. "Нұр Ақтөбе" ауданында жыл соңына дейін 23 көп қабатты үй пайдалануға беріледі. Бүгінге дейін көп балалы аналарға пәтердің бастапқы жарнасы үшін 40 сертификат табысталған. Ал, пәтер кезегінде 22 мың адам тұр. Ал, "Нұр Ақтөбе" ауданының 3,4-ші шағын аудандарында 9 қабатты 315 пәтерлі үйлер салынып жатыр. 2 мектеп бой көтереді. Облыста 2017-2019 жылдар аралығындағы жобалардың жалпы құны 50 млрд. теңгеден асады. Жыл соңына дейін жалпы аумағы 130 мың шаршы метрге жететін 2000-нан астам пәтер пайдалануға беріледі. Шаһар басшысы жер кезегі туралы да айтып берді. Қазір қала бойынша 140 мың адам жер кезегінде тұр. 400-ге бау-бақша ұжымы бар. Оның 40-на жеке тұрғын үй құрылысы мәртебесі беріліп жатыр. Енді инфрақұрылымын жаңарту қажет. Көгілдір отын тарту үшін қала басшысы республикалық бюджеттен қаржы сұрады. Ал, «Бақытты отбасы» бағдарламасы бойынша 1090 өтініш түскен. Шаһар басшысының сөзінше, 400-ден астамы "Тұрғын үй құрылыс жинақ банкі" арқылы төлем қабілетін растады. Бұған 2 миллиард теңге ақша бөлініп, игерілген. Алда тағы 555 отбасына қаржы сұралған. Асқар Мәмин табан тіреген келесі нысан - Ақтөбе ферроқорытпа зауытының №4 цехы. Цех 5 жыл бұрын 23-тамызда жұмысын бастаған. Соңғы 5 жылда атқарылған жұмыстардың нәтижесінде биыл ферроқорытпа өнімінің көлемін 1 млн. тоннаға жеткізген. Зауыт жылына 355 мың тонна өнім шығарады. Жыл сайын шығарылатын өнім саны артып келеді. Келесі жылы өнім көлемін 400 мың тоннаға жеткізу жоспарланған. Бұл үшін еңбек күші маңызды. Мұнда қызметкерлердің орташа жасы 34. Үкіметтен өнеркәсіп басшылары қаржылай қолдау сұрамады. Мәселе жоқ дейді. Қазір шығарылған өнімдер Америка, Жапонияға экспортталады.