Бүгін өнер орталығында облыс педагогтарының тамыз кеңесі өтті. Конференцияға қатысушылар білім басқармасының басшысы Ләззат Оразбаеваның "4-ші революциялық жағдайдағы адами капитал" тақырыбындағы баяндамасын тыңдады. Облыс әкімі Бердібек Сапарбаев аймақтың үздік педагогтары мен "Үздік білім беру ұйымдары" байқауының жеңімпаздарын марапаттады. Жоғары оқу орындарын "Серпін-2020" мемлекеттік бағдарламасы бойынша аяқтаған 60 жас маман педагогтар қатарына қабылданды. 1 аптадан соң мектептерде сабақ басталады. Ал 2017-2018-ші оқу жылын аймақ қандай нәтижемен аяқтады. Ұстаз бен шәкірттің бар жетістіктері өнер орталығының холына жайылған мына көрмеге сыйдырылған. Кеңеске қатысу үшін Астанадан білім және ғылым министрлігінен жеткен өкілді қасына ертіп жүріп, өңір басшысы Бердібек Сапарбаев аралады. Мұнда ЖОО, колледж студенттерінің де, мектеп оқушысы, бақша тәрбиеленушісінің де үздік жұмысы қойылған.
Бақша кезегіне қоюды автоматтандыру осы жылғы өзгеріс. Бүгінде облыста 545 мектепке дейінгі ұйым жұмыс жасайды. 49 мыңға жуық бүлдіршін бақша тәрбиесімен қамтылған. Биылғы жылдың тағы бір ерекшелігі мектепке дейінгі ұйымдар оқулықпен қамтылады. Сондай-ақ, 1-ші класқа бала қабылдау да автоматтандырылады. Ол жұмысты Ләззат Оразбаева мектеп басшыларына 1-ші қазанға дейін аяқтауды тапсырды. 3,6, 8-сыныптар жаңартылған білім мазмұнымен оқи бастайды. Ал 4, 9, 10-сыныптарда апробация басталады. Олар жаңартылған білім беру мазмұнына 2019-шы жылы көшеді. 99 мектепте 4 пән ағылшын тілінде оқытылып жатыр. Жалпы өңірде 398 орта білім беретін мектеп бар. Оқушылар саны 134 мың 678. Ұстаздардың жалақысы да биыл 1-ші қаңтардан бастап өсті. Ауыл мектебінде сабақ беретін педагогтың жалақысы 25 пайызға, жаңартылған мазмұнмен оқытатын ұстаз жалақысы 30-50 пайызға артты. Ал пәнді ағылшын тілінде жүргізетін мұғалім жалақысына қосымша 35 мың теңге алады.