Ақтөбе көлік, коммуникация және жаңа технологиялар колледжінде "Парасаттылық мектебі" кабинеті ашылды. Бөлменің ашылу салтанатына облыстық білім бөлімінің басшысы Ләззат Оразбаева, сыбайлас жемқорлыққа қарсы іс-қимыл агенттігінің Ақтөбе облысы бойынша департаментінің басшысы Мирлан Мұхамбетов қатысты. "Парасаттылық мектебі" арқылы колледж оқушылары терең ойлауды, өзін-өзі ұстай алуды үйренбекші. Бұл бөлмеде әрбір жас оқытушылармен бірге қалаған тақырыбында жұмыс істей алады. Түрлі дебаттарға қатысып, өз ойын дамытумен айналысады. Сол себепті де мектептің жетекшісі студенттер арасынан таңдап алынған. 1400-ге жуық білім алушысы бар колледжде былтырдан бері адалдық дүкені жұмыс жасайды. Шағын сөреде оқуға қажетті қалам, дәптерлер қолжетімді бағада сатылады. "Айқын" студенттерге арналған қызмет көрсетуге арналған орталығы, "Шығармашылық" оқу-тәжірибе үйірмесі де жемісті жұмыс істеп келеді. Барлық орталықтың көздегені бір. Оқушыға дұрыс бағытта білім беру. Кеше ғана Байғанин ауданы мен Кеңқияқ ауылынан іссапардан оралған облыстың бас ұстазы өңірде "саналы ұрпақ" жобасы аясында бірқатар жұмыстар атқарылып жатқанын жеткізді. Колледждер мен мектептерде адалдық дүкендері ашылған. Адалдық сағаттары тақырыбында сабақтар тұрақты өткізіліп тұрады. Енді мектептер мен орта білім беру ордаларында парасаттылық мектептері ашылып жұмыс жасай бастайды.