312-ші атқыштар дивизиясы даңғылы бойында жылу магистралі жаңғыртылып жатыр. Орталық желі диаметрі 720 мм-лік құбырға ауыстырылуда. "Ақтөбе су энерджи групп" АҚ-ы басшылығы бүгін осы нысанда баспасөз турын өткізді.
Жаңартылып жатқан бұл желі Тұрғындар қалашығы ауданы мен Тургенев көшесі бойындағы көпқабатты үйлерге жылу таратады. 42 жыл бұрын жргізілген магистральді құбырлардың тозығы жетіп тұр. Жылу жүйесінің 330-шы тіреуінен 412- тіреуіне дейінгі бөлігі жаңғыртылуда. Диаметрі 720 мм болатын құбыр жылуды сыртқа жылыстатпай, бойында ұстайды. Ол үшін Ссырты арнайы жылтырақ қабатпен қапталған. Бүгінгі баспасөз турында облыстық табиғи монополияларды реттеу, бәсекелестікті және тұтынушылардың құқықтарын қорғау департаменті өкілдері құрылыс барысын бақылап көрді. Шаһарда ескірген жылу құбырларын ауыстыру жұмыстары биыл да жалғасты. 3 шақырымға жуық жылу жүйесі күрделі жөндеуден өтіп, жаңартылған. Жаңа жылыту маусымы алдында ұзындығы 2 мың метрден асатын 18 құбыр гидравликалық сығымдаудан өтіп, тексерілуде. Құбырларды тексеру кезінде ешқандай бөліктен ақау шықпағаны белгілі болды. Қазір жөндеу жұмыстарының 70 пайызы аяқталған. Қалған бөлігін мамандар осы айдың соңына дейін бітіруге уәде етіп отыр. Бұл жерден басқа Әбілқайыр хан даңғылы бойындағы көпқабатты үйлер мен Әйтеке би көшесі, 11-ықшам аудандағы жылу құбырлары қалыпқа келтірілуде. Жылыту маусымы басталғанға дейін мамандар 23 қазандық пен 6 сорғы бекетіне ағымдағы жөндеу жұмыстарын жүргізген.Ақтөбедегі жылу құбырларының 60 пайызы ескірген. Биыл инвестициялық бағдарлама шеңберінде диаметрі 720 мм болатын 444 метр жылу желісі ауыстырылған. Тозығы жеткен желілердің орнына жылу оқшаулағыш құбырлар қолданылады. Бұл құбырлардың жарамдылық мерзімі ұзақ, әрі орынсыз жылу шығынын азайтады.