Темір жол вокзалындағы автотұрақ халыққа тиімсіз. Тұраққа ақылы кіріп шығу онсыз да бұл аумақта таусылмайтын көліктерді бөгеп, кептеліс жасап тұр. Осындай мәлімдеме жасаған жүргізушілер қарапайым халыққа тиесілі жерді жалға беру әу бастан-ақ қате шешім болды деген уәж айтады. Темір жол вокзалына кіріп-шығу жарты жылдан бері ақылы. Мәселен, туысқанын немесе жалдаған жолаушысын темір жол вокзалына шығарып салу үшін жүргізуші 15 минуттан көп аялдайтын болса 100 теңге төлейді. Жүргізушілер бұл жаңашылдыққа қарсы. Олар темір жол вокзалын қоғамдық орын деп есептейді. Бірақ, жүргізушілердің наразылығын бақандай 6 айдан бері тыңдар құлақ болмай отыр. Бұл 1 жарым гектар аумақ жекенің иелігіне өткелі кептеліс жиілеген. Әсіресе кешкі сағат төртте басталған кептеліс екі сағатқа жалғасады. Қалалық әкімдікпен келісім- шартқа отырған "Ақтөбе паркинг" жеке кәсіпкерлігі меншігіндегі жер үшін 25 млн теңгені бес жылда қазынаға өтеуі тиіс. Жалға алған мекеме аумақты түгелдей жарықтандырып, камералар орнатып жатыр. Мынадай өткелдер жанындағы қызметкерлері әрбір көліктен 100 бен 300 теңге көлемінде пұл жинайды. Осындай уәж айтқан жүргізушілер кәсіпкерлік иесі алдымен пойыздар кестесіне сай кептелісті азайтуды бастаса дейді. Содан кейін барып теміржол маңын тәртіпке келтірсе деген тілектері бар. Әйтпесе қанша бейнебақылау болғанымен вокзал маңындағы ұрлық-қарлық азаймаған. Жалпы 350 орынға шақталған автотұрақ жарты жылда біраз жүргізушінің қалтасын қағыпты. Тегін деп қалдырылған екі қатардағы бос орындарға осы жерде нәпақасын тауып жүрген жүргізушілердің көліктері сыймайды. Әрбір кіріп шыққанына жүз теңге төлегесі келмейтін темір тұлпар иелері көлденеңінен тұруға мәжбүр. Болмаса көлік иелері өздеріне бір күнге жүз теңге төлеп кіріп, жеке өз орындарымызды белгілесе деген тілектерін жеткізді.