Бүгін "Ақтөбе-адалдық алаңы" жобалық кеңсесінің ұйымдастыруымен облыстық денсаулық сақтау басқармасына өкпені жасанды тыныстандыру аппараттары табысталды. Құрылғылар жобалық кеңсе еріктілері мен қоғам белсенділерінің қаражатына алынды. Жуырда бұл аппараттар Байғанин және Шалқар аудандарының ауруханаларына жеткізілетін болады. Қайырымдылық шараға Ақтөбе облысы әкімінің орынбасары Қайрат Бекенов, жемқорлыққа қарсы департамент басшысы Мирлан Мұхамбетов және облыстық денсаулық сақтау басқармасының басшысы Самат Данияров қатысты. Алғашқы болып сөз алған облыс әкімінің орынбасары өкпені жасанды желдету аппараттары "Адалдық алаңы" жобалық кеңсесінің волонтерлары мен қоғам белсенділерінің қаражатына сатып алынғанын атап өтті. "Армед" маркалы қос аппараттың құны 3 млн теңгеге жуық. Аппараттарды қабылдап алған облыстық денсаулық сақтау басқармасының басшысы Самат Данияров ұйымдастырушыларға алғысын білдірді. Сондай-ақ, өңірде коронавирус пен пневмонияға қатысты ахуал оңалып келе жатқанын мәлімдеді. Өкпені жасанды желдету аппараттары күні ертең облыстың Байғанин және Шалқар аудандарына жөнелтіледі. Себебі, қазіргі таңда аталған аудандарда эпидемиологиялық жағдай күрделі. Ал, оттегі баллондарын шалғай өңірлерге жеткізу қиынға соғады. Оның үстіне бұл заманауи құрылғылар бір мезетте екі адамды жасанды тыныс алдыруға мүмкіндік береді.