Ақтөбеде 8 автогаз құю станциясында сұйық газ талонға беріліп жатыр. Жыл аяғында осылайша олар кәсіпорындармен арада жасалған келісімшарт шеңберінде міндеттерін орындауда. Бұл туралы облыстық энергетика және тұрғын үй-коммуналдық шаруашылық басқарма басшысының орынбасары Нұртай Сертаев айтты.
Қалада барлығы 90 автогаз құю станциясы бар. Соның сегізінде сұйық отын толанға берілуде. Өйткені осы стансалар белгілі бір кәсіпорындармен газды талонға босату туралы келісімге келген. Сол міндеттерін ғана орындап жатыр. Әйтпесе, облыста сұйытылған газға тапшылық жоқ, дейді әкімдіктегілер. "СНПС-Ақтөбемұнайгаз" АҚ-ы облыста ай соңына жететін 2500 тонна газ береді. Одан бөлек Ақтөбе станциясына 6 вагон-цистернаға тиелген 72 тонна газ жеткізілмек. Қараша айында автогазға қажеттілік 14 мың тонна. ҚР Энергетика министрлігі 12 мың 106 тоннаны бекіткен. "СНПС-Ақтөбемұнайгаз" АҚ -ы жетпейтін көлемді толықтырып жатыр. Айта кету керек, өңірде 50 000-ға жуық көлік сұйытылған газбен жүреді.