Облыста мектеп оқушыларының 90 пайызы жаңа оқу жылында қашықтан оқытылады. Ал, қалған 10 пайызы дәстүрлі түрде мектеп парталарында білім алатын болады. Олар шалғай ауылдардағы шағын мектептердің оқушылары. Бұл мектептерде барлық санитарлық талаптар сақталып, бір сыныпта оқитын бала саны 5-7-ден аспайды. Жаңа оқу жылында облыста 402 мектеп өз жұмысын бастайды. Оның 207-сінде оқушылар дәстүрлі әдіспен білім алатын болады. Яғни, бір сыныпта 5-7 баладан асырмай оқытылады. Бұл ретте арақашықтық пен санитарлық талаптарға аса жоғары мән берілмек. Бүгін өңірлік коммуникациялар қызметінде өткен баспасөз мәслихатында облыстық білім басқармасының басшысы Ләззат Оразбаева осылай мәлімдеді.
Облыс орталығында 82 мектеп болса олардың барлығы жаңа оқу жылын онлайн режимде бастайды. Қазіргі таңда облыстық білім басқармасы "Қазақтелеком" АҚ-мен бірлесіп өңір тұрғындарын сапалы интернетпен қамту бойынша жұмыстар атқаруда. Сондай-ақ, оқушылар компьютерлермен де қамтылатын болады. Белгілі болғандай, өңірде 44 мың компьютерге қажеттілік бар болса, оның 20 мыңы еліміздің білім және ғылым министрлігінің тарапынан қамтылатын болады. Ләззат Оразбаева атап өткендей, егер елімізде эпидемиологиялық ахуал тұрақтанса, жаңа оқу жылының екінші тоқсанынан бастап бастауыш сыныптар үшін кезекші кластар ашылатын болады. Яғни ата-аналардың сұранысы бойынша, кейбір оқушылар мектеп парталарында білім алады. Атап өтейік, биыл облыста бірінші сыныпқа 19700-ге жуық бала барады. Ата-аналар егов порталы арқылы электронды түрде құжаттарын тапсыруда. Құжат қабылдау тамыздың 20-на дейін ұзартылды.