Облыста 13 мыңнан аса оқушыны мектепке әзірлеуге қаржы бөлінді
"Мектепке жол" акциясы бойынша биыл мұқтаж отбастарына көрсетілетін көмек түрі өзгерді. Жылдағыдай балаларға киім-кешек, оқу құралдары сатып алынбайды. Оның орнына ата-аналардың есепшотына әр баланы мектепке әзірлеу үшін 37 мың 389 теңгеден аударылып жатыр. Облыс бойынша материалдық көмек 13 мың бала үшін республикалық бюджеттен аударылған. "Мектепке жол " қайырымдылық акциясын өткізу үшін облыс әкімдігінде арнайы штаб құрылып, жұмыстар жоспарлы жүргізілуде, дейді облыстық білім басқармасының өкілдері. Әр балаға республика бюджеттен 37 389 теңге қарастырылған. Бұл ақша оның ата-анасының есепшотына аударылады. Материалдық көмек 5 түрлі санаттағы отбасының балаларына беріледі. Олар: табысы күнкөріс деңгейінен төмен және атаулы әлеуметттік көмек алатын отбасы балалары, жетім және ата-анасының қамқорлығынсыз қалғандар , төтенше жағдайға тап болған отбасы балалары, мұнан өзге көмекке мұқтаждар тізіміне енгізілген мектеп оқушылары. Жаңа оқу жылы қарсаңында облыс бойынша мұндай көмек алатын мектеп оқушыларының саны 13 мыңнан асады. Мектептегі әлеуметтік ұстаздар көмек берілуі тиіс отбасы балаларының тізімін жасап, білім басқармасына жолдайды. Ақша есепшотқа түскен күннен бастап 15 күн ішінде мақсатты түрде жаратылуы тиіс. Сатып алынған заттардың түбіртегі кейіннен әкімдікке тапсырылады. Ата-ана ақшаның қандай мақсатқа жұмсалғандығы туралы толық есеп беруге міндетті. Ал 37 389 теңгеге сатып алынуы тиіс мектеп құралдары мен киім-кешектің тізімі де шектеулі. Бұл ақшаға мектеп формасын, оқу құралдары мен аяқ киім және спорттық форма алуға ғана рұқсат етілген.Количество показов: 903
Дата создания: 15.08.2022 17:51:25
