Ақтөбеліктер сыбайлас жемқорлыққа төзімсіз. Жемқорлық іс-әрекеттеріне куә болған жағдайда бірден құқыққорғау органдарына хабар берушілер қатары көбейіп келеді. Бұл туралы бүгін "Антикор орталығында" өткен баспасөз мәслихатында облыстық сыбайлас жемқорлыққа қарсы қызмет департаментінің басшысы Бауыржан Балғабеков мәлімдеді. Былтыр аталған мекемемен қоян-қолтық жұмыс жасаған 11 адамға 2 млн теңге көлемінде біржолғы сыйақы тағайындалған. Жемқорлық әрекетке барған лауазымы жоғары тұлғалар арасында қала әкімінің орынбасары, тұрғын үй- коммуналдық шаруашылық бөлімі басшысы, аудандық жергілікті атқарушы органдардың басшылары бар. Ал облыстық құрылыс басқармасының бұрынғы басшысы 7 жылға бас бостандығынан айрылған. Былтыр мемлекетке келтірілген залал көлемі 240 млн теңге. Оның 201 млн теңгесі өндірілген. Бюджет қаражатын мақсатсыз пайдалану бойынша 25 мемлекеттік орган мен квазимемлекеттік сектор субъектілеріне тексеру жүргізілген. Сыбайлас жемқорлыққа қарсы мәдениетті қалыптастыру мақсатында мыңнан аса іс-шара өткізілген. 70%-ы пандемияға байланысты онлайн жүргізілген. Оған шамамен 375 мың ақтөбелік қатысқан. Карантиндік шектеулерге орай қолға алынған "Антикор лайв" жобасы бойынша көбірек тікелей эфирлер өткізіле бастаған. Әлеуметтік желілердегі ресми парақшалар арқылы азаматтарға тегін заң көмегі көрсетілуде. "Адал көмек" жобасы аясында 80 адам құқықтық кеңес алған. Жеке қабылдаулар да жүргізілген. Жобаның заңгері Азамат Сағал жол-көлік оқиғасында зардап шеккен азаматшаны сотта тегін қорғап шыққан. Сонымен қатар, барлық аудан орталықтарында мемлекеттік органдардың ашықтығын қамтамасыз етуге арналған "сервистік әкімдік" бөлімдері жұмыс жасайды. Мұндай қызметтер енді ауылдық округтерде ашыла бастайды.