Жаңа жылда жалақы, зейнетақымен қатар азық-түлік бағалары да өсті. Қымбатшылық күнделікті тұтынатын тауарлармен қоса еттің бағасынан да сезіледі. Желтоқсандағы мерекелер қарсаңында саудагерлер тауар құнын біршама өсірген. Шарықтаған баға әзірге сол күйінде тұр. Азық-түлікпен бірге тұрмыстық техника, тіпті шаштараз қызметіне шейін қымбаттаған. Базардағы шарықтап кеткен бағаға құзырлы мекемелер де тосқауыл бола алмайды. Коммуналдық базарлардағы азық-түлік бағамы күн сайын өсіп барады. Жыл соңында қала әкімі әлеуметтік маңызы бар азық-түлік тауарлары алдағы екі айда қымбаттамауы керек деп тапсырма берген болатын. Тіпті әкімдік ірі бөлшек сауда кәсіпорындары, базарлар мен жергілікті тауар өндірушілермен бірге меморандумға қол қойды. Бірақ, базарлардағы баға басқаша сөйлейді. Ет, көкөніс, пісте майы, ұн өнімдері, жұмыртқа бағасы көтерілген. Тек жеміс-жидектер осы үш күндікте арзандап жатыр. Дүкен сөрелеріндегі азық-түлік бағаларының түспей тұрғанын ақтөбеліктер байқаған. Күнделікті тұтынатын өнімдерді алуға келген тұрғындар күн санап баға шарықтап бара жатқанына наразы. Соғым уақыты болса да бұл айда еттің бағасы да өскен. Қой, сиыр, жылқы еттерімен қоса құс еті де ұшып тұр. Қой еті ірі қара етімен бірдей бағада сатылуда. Тек күнделікті асқа тұтынылатын картоп, пияз, сәбіз, қырыққабаттың бағалары ғана қолжетімді. Олардың бағасына келер болсақ, 1 келісі 120 мен 500 теңгенің аралығында. Жылда қымбатшылыққа бірінші ілігетін қарақұмықтың бағасы 20 теңгеге өскен. Қазір дүкендерде қарақұмықтың 350 теңгеден арзаны жоқ. Сондай-ақ, тұрмыстық заттардың құны 5 жарым пайызға көтерілген.