Балаларына компьютер алып беруге мүмкіндігі жоқ отбастарына және ата-ана қамқорлығынсыз қалған оқушыларға жаңа оқу жылы қарсаңында тегін компьютерлер мен ноутбуктар беріледі. Қала бойынша тоғыз мыңнан аса жағдайы төмен отбасылар тіркелген. Ал олардың сегіз мыңға жуығы компьютер алуға өтініш білдірген. Компьютерлік техника алдымен ерекше қажеттілігі бар балалар мен жетімдерге беріледі. Одан кейін атаулы әлеуметтік көмек алатын отбасы балаларына, мүгедек ата-анасы бар, көпбалалы отбасынан шыққан балаларға таратылады. Сонымен қатар, жыл сайын өткізілетін "Мектепке жол" акциясы биыл да жалғасын таппақ. Бірақ жылдағыдай оқу құралдары мен киім-кешек емес, биыл акция аясында мұқтаж отбасындағы балаларға планшет, ноутбук, компьютер беру жоспарланған. Ал қала бойынша мектептердің балансында жалпы саны 10 мың компьютер бар. Бұл техника алдағы уақытта белгіленген отбасыларға таратылып, оқу жылы аяқталған соң мектепке қайтарылады. Қашықтан оқитын бала үшін интернет желісі де қолжетімді болуы керек. Қаладағы ұялы телефон байланысы нашар, тіпті ғаламтор жоқ жерлер анықталды. Қазір бұл мәселе бойынша барлық байланыс операторларымен жұмыс жүргізілуде. Сонымен қатар, мектеп оқушылары мен мұғалімдер үшін қолжетімді тариф іске қосылады. Ал қаладағы мектептер оқушыларға оқулықтар ғана емес, компьютер таратуды да бастап кеткен. №56 жалпы білім беретін мектеп қашықтан оқытуға сақадай сай. Мұнда еңбек ететін 127 мұғалім арнайы курстан өтіп, сертификат алған. Сонымен қатар, мектеп әкімшілігі тарапынан 100 балаға компьютер берілген. №56- мектеп ұжымы биылғы оқу жылын жақсы жаңалықпен бастайды. Мектептің жанынан көптен күткен тағы бір оқу ғимараты бой көтерді. Қазір ішкі жұмыстар жүріп жатыр. 300 орындық су жаңа ғимаратта 900-ге жуық оқушы оқиды деп жоспарланған. Төрт жыл бойы үш ауысымда оқыған балалар енді ел қатарлы екі ауысымда білім алады. Оқушының көптігі сондай 600 орындық мектепте 1900 бала оқиды. Биыл 200-ден аса шәкірт №56-шы мектеп табалдырығын алғаш аттайды. Ал бастауышта 900-ге жуық оқушы болса, оның тең жартысының ата-анасы балаларын кезекші сыныпта оқытуға өтініш берген. Жалпы қалада оқушылар саны 87 050. 83 жалпы білім беретін және екі кешкі мектеп бар. 1-ші және 10-шы сынып оқушыларына оқулықтар толығымен таратылып болды. Сонымен қатар, жаңа оқу жылынан бастап 11-шы сынып оқушылары жаңа мазмұнда білім беру бағдарламасына көшеді. Осыған байланысты жаңа оқулықтар келіп жатыр. Ал тамыздың 20-сына дейін бұл оқулықтар таратылып болады. Қалада бес мыңнан аса мұғалім онлайн, қашықтан оқыту бойынша вебинар, семинарларға қатысты.