Бүгін мобильді топ қаладағы коғамдық көліктерге мониторинг жүргізіп, бетпердесіз жолаушыларға айыппұл салды. Тұрғындарға карантин уақытында санитарлық талаптарды сақтау мен қоғамдық орында масканы тастамай киіп жүрудің маңыздылығы тағы бір мәрте ескертілді. Еліміздің денсаулық сақтау министрлігі қоғамдық орындарда маска тағып жүруді жалпыға бірдей міндеттесе де, бұл бұйрыққа әлі құлақ аспай жүргендер баршылық. Қаламызда карантин кезінде арнайы құрылған мобильді топ өкілдері бір айдан бері тұрғындарға автобустарда, дүкендерде қорғаныс маскаларын тағып жүру керектігін ескертіп келді. Енді тәртіпке бағынбағандарға аяушылық жоқ. Бүгін қаланың әр ауданына бөлініп, арнайы мониторинг жүргізген 25 мобильді топ өкілдері аялдамаларда тұрған автобустарда жолаушылардың маска таққан-тақпағанын тексерді. Тәртіп бұзған жолаушылардың жеке мәліметтері алынып, оларға 30 айлық есептік көрсеткіш, яғни 83 мың теңге айыппұл салынатындығы ескертілді. Еске сала кетсек, 30- шілдеден бастап қазақстандықтар көшеде маска тағып жүруге міндеттелді. Бұл туралы елдің бас мемлекеттік санитарлық дәрігері Айжан Есмағамбетованың қаулысында айтылған. Кейіннен денсаулық сақтау министрі Алексей Цой бұл ереже тек ересектерге ғана емес, балаларға да қатысты екенін түсіндірді. Сонымен қатар, ол жеке қорғаныс құралдарын барлық қоғамдық орындарда, соның ішінде дәмханаларда, спортпен шұғылдану кезінде де кию керек екенін айтқан болатын. Сондай-ақ министрдің бұйрығымен елімізде 5 жасқа дейінгі балаларға маска тақпай жүруге рұқсат берілді.