Мал базарда құрбан айт мерекесіне әзірлік қызу жүріп жатыр. Жұрттың басым бөлігінің қойды ғана қалтасы көтеретіндіктен базарда қойдан көп түлік жоқ. Ірі қарадан сиыр да азын-аулақ тасылып жатыр. Түйе мұнда мүлдем сатылып жатқан жоқ. Түйенің құны 500-600 мың теңгеге барады. Сондықтан тек қыста 1-2 басы соғымға сатылатыны бар дейді мұндағылар. Ал сиырдың орташа бағасы 170-250 мың теңге. Құрбандыққа жарайтын қойлар 30 бен 50 мың теңгенің арасында. Сатушылар құрбан айт кезінде саудаласуға болады деп отыр. Мал бағасынан 2-3 мың теңгеге арзанға беріледі. Жыл сайынғы есеп бойынша шамамен 3-4 мың бас қой сатылады. Сиырдан 100-150-і өтеді. Қой өзіміздің аудандардан және Батыс Қазақстан облысынан жеткізіледі. Ал сиырлар өз ауылдарымыздан және Қостанай, Орал жақтан базарға түседі. Мал базарда мал соятын екі жер әзірленіп жатыр. Бір мезетте 70 басқа дейін мал сойылады. 70-тен аса қасапшы жұмыс жасайды. Бүгін мешіттен имам келіп, оларға арнайы семинар өткізді. Төрт түліктің жылқыдан басқа түрі құрбандыққа шалынады. Қой, ешкі 1-2 жастан асуы, сиыр екі жастан, түйе 5 жастан асуы шарт. Малдың ешқандай кемістігі болмауы керек. Қасапшылардың еңбегі бағаланады. Мал сою 3 мың теңгеден басталады. Мәселен, қойды жіліктеуге 30 минуттай уақыт кетеді. Сондықтан азаматтар алдын ала кезек күтіп, сабыр сақтағаны дұрыс. Егер құрбан шалушы терісі, еті, бас, сирақтарын өзі сыйлап, тастап кетіп жатпаса, қасапшының малдың бір тал қылшығын да өзіне алып қалуға құқы жоқ. Сондай-ақ, мал базар басында кейін жоқ-жітіктерге тарату үшін ет қабылдайтын бекет болады. Құрбан айт тойланатын 3 күнде де мал базар басында имамдар, қасапшылар, тәртіпті қадағалайтын полиция қызметкерлері кезекшілік етеді.