Мүгедек ер адамды ақтөбелік еріктілер құлдықтан құтқарды

Шымкент пен Ақтөбеде адам саудасымен айналысушы ұйымдасқан қылмыстық топ болуы мүмкін. Шымкенттен Ақтөбеге құлдыққа берілдім деген 46 жастағы мүгедек ер адамның бөліскен деректерін қазір полиция тексеріп жатыр. Мүгедек арбасына таңылған Александр орталық базар маңында қайыр сұрап жүріп еріктілер назарына іліккен. Өзіне көмектеспек болған волонтерларға ол тіленшілікпен мәжбүрлі түрде айналысып жүргенін айтқан. Александрдың жасы 46-да. Түркістан тумасы. Отбасы болған. Әйелімен ажырасқаннан кейін күйзеліске ұшырап, ішімдікке салынса керек. Көлік астына түсіп, мүгедек болып қалған. Шарасыздықтан Шымкентте қайыр сұраумен айналысқан ол өзіне қамқорлық көрсетеміз деген ерлі-зайыптылардың құлдығына түсіп қалады. Айтуынша, күрд отбасы өзі секілді бірнеше мүгедекке пәтер жалдап, тіленшілікпен айналысуға мәжбүрлеген. Ал Ақтөбеге ол қыс мезгілінде жеткізілген. Шымкенттегі қожайынымның әйелі мені осындағы інісіне беріп жіберді, дейді. Халықтан көбірек ақша түсу үшін балдақпен жүрген Александрды қол арбаға отырғызған. Ол күн сайын таңнан кешке дейін орталық базар аумағында, ал жұма күндері мешіттер маңында қайыр сұраған. 1 ай құлдықта болған мүгедекті еріктілер құтқарған. Олар арбаға таңылған мүгедекке азық-түлік беріп көмек көрсетпек болған. Жәбірленуші мүмкіндікті пайдаланып, басына түскен жағдайды қысқаша баяндап берген. Еріктілер дереу полиция қызметкерлеріне хабарлаған.
Александр күніне 40-50 мың теңгеге дейін ақша табуы керек болған. Одан аз ақша жиналған күні қожайынынан таяқ жеген. ҚР Қылмыстық кодексінің "Адам саудасы" бабымен іс қозғалып, тергеу жүріп жатыр.
"Дәріс" қоғамдық қорының өкілдері күдіктілер тиісті жазасын алады деп үмітті. Себебі қоғамдық қорға жыл басынан бері адам саудасына қатысты 8 арыз түскен. Соның екеуі ғана сотқа дейін жетті. 
Количество показов: 657
Дата создания: 06.04.2023 22:11:00