Бұған дейін жалдамалы пәтерде тұрып келген Екатерина Бюллер қыстауға басқа баспана іздегенімен, іс нәтижесіз. Қазіргі тұрып жатқан пәтерді иесі сатуға шығарған. Тек жәрдемақымен күндерін көріп отырған отбасы алдағы күнін ойлап, алаңдаулы. Көмек сұрап, қалалық әкімдікке де барған. Отбасы Әуе қалашығы ауданындағы бұл баспананы 6 жылдан бері жалдап тұрады. Ай сайын 70 мың теңге пәтер ақысын төлейді. Ал қаңтарда пәтер иесі Ресейден келіп, оны сатуға шығармақ. Онсыз да қиындықты аз көрмеген әйел енді жыл соңына дейін өздері үйренген пәтерді босатуы керек. Екатерина Бюллердің өзімен бірге тұратын ұлы Дмитрий ІІ- топ мүгедегі. Ал кішкентайынан бағып өсірген 13 жастағы жиені Виктордың туғаннан тілінің мүкісі бар, сөйлей алмайды. Қызы туа салысымен, баласынан бас тартқан. Содан бері Виктор нағашы әжесінің қамқорлығында. Карантин кезінде де бұл отбасы үкімет ұсынған көмектен құр қалған. Ал мектеп жасындағы мүгедек немересі үшін онлайн оқуға қажетті планшет пен ноутбук сұрамаған. Әйел қаладан қалтасы көтеретін жалдамалы пәтер де іздеп көрген. Бірақ отбасының жағдайымен танысқаннан кейін баспана иелері пәтерін беруден бас тартады екен. Екатерина Бюллер 56 жаста. Қазір жұмыс істемейді. Баласы мен жиенін бағып, солардың жәрдемақысына күнелтіп отыр. Ұлы Дмитрий мен немересі Виктор мүгедектіктеріне байланысты пәтер кезегіне тұрған. Қалалық тұрғын үй қатынастары бөлімінің сектор меңгерушісі Махаббат Баянқұлова биыл пәтер алушылардың қатарында олардың жоқ екенін айтты. Бір білгеніміз, кезегі келмегесін, баспана берілмейді. Ал уақытша пәтер үшін қалалық әкімдіктен көмек сұрау керек.