Биыл Кеңес Одағының батыры Мәншүк Мәметованың туғанына 100 жыл. Айтулы датаға орай бүгін Әлия Молдағұлованың облыстық мемориалды музейінде "Мәңгілікке маздаған қыршын ғұмыр" атты естелік кеш өтті. Оған Мәншүк Мәметова атындағы жоғары медициналық колледж студенттері мен оқытушылары, тарихшылар, "Қос шынар" қоғамдық қорының төрағасы Ғалымжан Байдербес қатысты. Мәншүк Мәметова Кеңес Одағының батыры атағын алған тұңғыш қазақ әйелі. Пулеметші қыздың ата-анасы ерте дүние салған соң оны туыстары өсірген. Мәншүктің балалық шағы Алматы қаласында өткен. Соғыс жылдарында медицина институтында оқып жүрген жерінен 1942 жылы қызыл армия қатарына өз еркімен сұранады. "Максим" пулеметінен оқу атуды меңгереді. Калинин майданы құрамындағы 21-ші гвардиялық атқыштар дивизиясының батальонында қызметін бастайды. Мәншүк небәрі 21 жасында шайқаста қаза тапты. Псков облысындағы Невель қаласында қазақ халқының даңқты қызының естелігі сақталған. Бүгінгі шарада батыр қыздың өміріне арналған тарихи деректер көпшіліктің назарына ұсынылды. 1944 жылы 1-ші наурызда КСРО Жоғары Кеңесі президумының жарлығымен аға сержант, қазақ қызы Мәншүк Мәметоваға Кеңес Одағының батыры атағы берілген. Кейіннен тәуелсіздік алған жылдары туған жері Батыс Қазақстан облысында ескерткіш орнатылды. Орал, Алматы, Ақтөбе және Қызылорда қалаларында батыр атағында көше бар.