Елімізде алдағы дүйсенбіден бастап карантин шаралары жеңілдетілетін болды. Мемлекеттік комиссия 17 -тамыздан бастап карантин шараларын кезең-кезеңімен алып тастау жоспарын бекіткен болатын. Бірақ демалыс күндері локдаун сақталады. Ақтөбеліктер карантиннің жеңілдетілгенін асыға күтіп жүр. Дегенмен, "індетті қайта өршітіп алмайық" деп алдағы күнге алаңдайтындар да аз емес. Қала тұрғындарының көпшілігі бұл жаңалықты қуана қабылдады. "Барлығы ашылсын" деген ақтөбеліктер шектеу шаралары шаршатқанын айтты. Айта кетейік, елде індет толық жойылмағанмен, таралуы азайды. Эпидемиологиялық жағдай тұрақты. Сауығып шыққандар 76 пайызға жетті. Ал маска тағу мен әлеуметтік қашықтықты сақтау әр адам үшін ережеге айналуы керек. 17- тамыздан бастап барлық өңірлерде сауда ойын-сауық орталықтары, сауда желілері, жабық базарлар, сұлулық салондары, шаштараз, СПА орталықтар, косметологиялық қызмет көрсететін кәсіпкерлік субьектілерінің қызметі жанданады. Сонымен қатар, бассейні жоқ фитнес орталықтар, бассейні жоқ моншалар мен сауналар, білім беру орталықтары, мектепке дейінгі балалар мекемелерінің кезекші топтары, ашық ауадағы аттракциондар жұмысын бастайды. Дегенмен аталған субьектілерге тұтынушыларды топтап қабылдауға болмайды. Ашық ауада жеке және бес адамнан артық емес топтық жаттығулар жасауға болады. Сондай-ақ, демалыс күндері шектеу шаралары сақталып, қоғамдық көліктердің қозғалысы тоқтайды және демалыс күндері жұмысқа баруға тыйым салынады. Сенбі-жексенбіде тек азық-түлік дүкендері мен дәріханалардың жұмысына рұқсат етіледі. Ал той жасауға болмайды. Сонымен қатар,ойын-сауық, спорттық, отбасылық, естелік, салтанатты және басқа да бұқаралық іс-шараларды өткізуге, барлардың, түнгі және ойын клубтарының, караоке, кинотеатрлардың, музейлердің қызметіне, конференциялар, көрмелер, форумдар өткізуге, қалалық және қоғамдық жағажайлар, ашық аквапарктердің жұмысына тыйым салынады.