Біз біргеміз! Ақтөбелік кәсіпкер Бану Тілегенова төтенше жағдай кезінде үйлерінен жырақта жұмыс істеп жатқан дәрігерлерді тамақтандыру акциясын бастады. Қаладағы мейрамханалардың бірінің қожайыны облыстық инфекциялық аурухананың 35 медицина қызметкеріне 4 мезгіл тамақ әзірлеген. Сұйық тағам мен салаттар, кондитерлік өнімдер коронавирус ауруына шалдыққан жандарға ем жүргізіп жатқан дәрігерлерге үлестірілді. Бану Тілегенова- бұрынғы дәрігер. Осыдан 15 жыл бұрын бизнес саласына кетпес бұрын облыстық инфекциялық ауруханасының хирургия бөлімінде жұмыс жасаған. Мамандығым- мақтанышым. Сол себепті ақ халатты абзал жандардың әрдайым жанашырымын, дейді ол. Тіпті көзіне жас үйірілді. Кәсіпкер бүгін әріптестерімен бірге аталған аурухананың қызметкерлеріне ыстық тамақ әзірледі. Індетпен күресу үшін дәрігерлердің дұрыс тамақтанып, әл жинауы маңызды. Кәсіпкер өзінің игі бастамасын шағын және орта бизнестегі өзге әріптестері қолдайтынына сенімді. Мұндай қиын-қыстау кезеңді жұмыла жеңе аламыз. Дәрігерлердің күні-түні жасап жатқан еңбегін бағалап, үйде отырайық, дейді Бану Тілегенова. Бастаманы жүзеге асыруға "Нұр Отан" партиясының Ақтөбе қалалық филиалы мұрындық болды. Партия ұжымы да "Біз біргеміз" акциясы арқылы тұрмысы төмен отбасыларға қол ұшын созуда.Қораптарға салынған тағамдар дәрігерлерге бірден жеткізілді. Қалада коронавирус жұқтырған жеті адам облыстық инфекциялық ауруханасында ем қабылдап жатыр. Аталмыш емхананың дәрігерлері індет таралған уақыттан бері отбасынан жырақта күні-түні жұмыс жасауда.