Бүгін фермерлер рұқсат етілген митингке шықты. Тұрғындар қалашығы ауданынан берілген аумаққа ондаған адам жиналды. Барлығының талабы бір - мемлекеттен қолдау дұрыс берілсін, мемлекеттік бағдарламалар айтылғандай орындалсын. Шаруаларды тыңдауға қалалық әкімдікпен қатар ҚР Ауыл шаруашылығы министрлігінен де арнайы өкіл келді. Мәртөк ауданында көбінесе сүт және сүт өнімдері өндіріледі. Кәсіпкер Нұрлан Ноғаев 2016 жылы осы кәсіпті дөңгелету үшін несие алған. 14 пайыздық несиенің 10 пайызын үкімет қайтарады дегенге сенген. Алайда, үміті ақталмады. Қазір алған кредитін 14 пайызбен өзі өтеп отыр. Нұрлан Ноғаев 250 бас малға 4-5 техника субсидиялануы қажет дейді. Сонда ғана шаруа жасауға жеңіл болады. Шаруалар үшін жем-шөп те қазір қиындық туғызып отыр. Тапқан сүттің 1 литрін 90 теңгеге өткізеді. Ақысы өтелмейді. Ал, Мұғалжар ауданынан келген Мәлік Қазанов құс шаруашылығын дамытқысы келген. Ол үшін микрокредиттік мекемелердің көмегіне жүгініпті. Уақытында қаржысын беріп болмаған соң көктемде алып, жаз бойы бағатын балапанын күзде бір-ақ алған. Өнім жоқ. Қазір несиесін зейнетақысынан төлеп отыр. Құс шаруашылығы үшін субсидияның берілетініне кәсіпкер сенбей отыр. Үкіметтен көмек жоқ дейді. Ал, ҚР ауыл шаруашылығы министрлігінің жанындағы мал шаруашылығы департаменті директорының орынбасары Қайрат Мұтаевтың сөзінше, құс етінің 50 пайызы шетелден жеткізіледі. Құс шаруашылығын, құс етін өндіріп, сатуды алда дамыту көзделген. Дегенмен, отандық құс жұмыртқасымен еліміз 100 пайыз қамтылып отыр дейді. Тіпті қазақстандық жұмыртқалар экспортқа шығарылады. Мал шаруашылығымен айналысатын ақтөбеліктердің де мәселесі көп. Субсидия жағы барлығын қинап біткен. Тіпті, өңірде мал етін өте арзанға өткіземіз деп отыр. Мәселе басынан дұрыс қаралмаған. Бүгінге дейін бармаған жер, баспаған таулары қалмаған кәсіпкерлер енді мәселелері толық шешіледі деген үмітпен тарқасты. Ал, министрлік өкілі шаруалардың жанайқайын тиісті орындарға жеткізуге уәде берді.