Жаңа жылдан кейін бағасы күрт көтеріліп кеткен азық-түлік тізімінде ет де бар. Республика бойынша статистикалық мәліметтер елде ет бағасының 16 пайызға бірден қымбаттап кеткенін растайды. Ақтөбеліктер де ет бағасының өскендігін бірден байқаған. Ал, сатушылар бағаның көтерілуіне не себеп екенін айта алмайды. Қаладағы жаңадан ашылған сауда орталығының бірінде ет сатушылар амалсыздан ескі бағаны ұстап тұрмыз дейді. Өйткені олар біраз уақыт бұрын өздері көтерме бағамен сатып алған етті саудалап үлгермеген. Сатушылар әр келі еттің таза бағасына 50 теңге ғана қосқанның өзінде сиыр еті орта есеппен 1800 теңгеден сатылуда. Жылқы етінің келісі 2 мың теңгеден асады. Жақсы қазының бағасы 3 мыңға барып қалады.
Еліміз бойынша қой етінің бағасы бір жылда 16,2%-ке өссе, жылқы еті келісіне 11,9%-ке, ал сиыр еті 8%-ке дейін қымбаттаған. Соңғы бір жыл ішінде қазақстандықтар етті көбірек жей бастады. Ал тұтынушылар арасында сиыр етіне сұраныс артқан, деп хабарлайды сарапшылар. Дегенмен қазір салыстырмалы түрде арзан болып тұрған тауық етіне сұраныс артқанға ұқсайды.Өткен жылдың шілде, тамыз, қыркүйек айларында әрбір қазақстандық орта есеппен 21,3 килограмм ет пен ет өнімдерін тұтынған. Бұл 2020 жылдың екінші тоқсанымен салыстырғанда бір килограмға көп. Ал 2019 жылдың үшінші тоқсанымен салыстырғанда 1,4 килограмға артық.Сұраныс артқан сайын ет бағасы да күннен күнге көтеріліп бара жатыр.