Ұялы телефондар арқылы аударымдарға қатысты елімізде заң әлі бекімеді. Яғни ертеңнен бастап кәсіпкерлердің барлық есеп-шоттары қадағаланады деген қауесеттер шындыққа жанаспайды. Ақтөбе қаласы бойынша мемлекеттік кірістер басқармасының хабарлауынша, мобильді төлемдер мен аударымдарды реттейтін заң жобасы сенатта мақұлданып тұр. Заң қолданысқа жіберілген жоқ. Бірақ мамандар салықты ашық көрсету бұл алдымен кәсіпкерлердің өзі үшін маңызды дейді. Мобильді аударымдарға қатысты заң жобасы мақұлданғалы жұрт даурығып жүр. Әсіресе саудагерлер мен қызмет көрсету саласындағылар. Онлайн төлемге әбден үйренген бизнес орта енді заң қолданысқа енгенде қандай күй кешпекпіз деп отыр. Табанасты қолма-қол ақшамен есеп айырысуға көшіп кеткен кәсіп иелері де бар. Ал онлайн төлемнен бас тартып жатқан әуелі - таксистер болып шықты. Такси жүргізушілері патент негізінде арнайы салық режимін қолдана алады. Жалпы шаһарда мобильді аударымдар туралы құжат мақұлданғалы банкомат жағалаған адам көбейген. Дегенмен қалалық мемлекеттік кірістер басқармасы ақтөбеліктерге ерте байбалам салудың қажеті жоқ деп отыр. Мамандар салықты ашық көрсету бұл алдымен кәсіпкерлердің өзі үшін маңызды дейді. Сауда және қызмет көрсету – кәсіпкерлікке жатады. Демек түсімнен бюджет те толуы тиіс. Ал онлайн аударымдардан еш алым жоқ. Сондықтан мәселені заң тұрғысынан реттеу үшін «мобильді төлемдер» түсінігі енгізілген. 2022 жылдан бастап банктерден тек кәсіпкерлік шоттарына түскен төлемдер туралы ақпарат алу жоспарлануда. Сондықтан, жеке аударымдарға салық салынбайды. Ал егер сіз жеке кәсіпкер болсаңыз, салық салу бойынша өзіңізге ыңғайлы режимді таңдай аласыз. Салық есептілігі "e-Salyq Business" қосымшасын енгізу арқылы автоматты түрде жасалады. Өйтпесеңіз, үнемі ақша аударылатын есепшот иесі күдікке ілініп, тексеріледі. Қазір қаржы органдары мен банктер арасында табысын жасыратындарды анықтау технологиясы жасалып жатыр. Бизнеске арнап жеке шот ашылуы мүмкін. Тұтынушылар сонда жібереді. Ал жеке адамдардың онлайн аударымдарына тексеру жүргізілмейді.