Бүгін мемлекеттік комиссия эпидемиологиялық жағдайды тұрақтандыру үшін елде 14 күндік карантин жариялады. Комиссия мүшелерімен бекітілген шектеу шараларына сәйкес, өңірлер арасындағы жолаушылар автобусы уақытша тоқтатылады. Қоғамдық көліктің жұмысы уақыт бойынша шектеледі. 65 жастан асқан адамдардың сыртқа шығуына тыйым салынады. Тұрғындардың көшелерде, саябақтарда, скверлерде 3 адамнан артық серуендеуіне шектеу енгізіледі. Ойын-сауық, спорт және басқа да бұқаралық, сондай-ақ отбасылық, еске алу шараларын өткізуге тыйым салынады. Сұлулық салондары, шаштараз, бассейндер, жабық базарлар, мәдениет нысандары, мектепке дейінгі балалар мекемелері, діни нысандар, кинотеатрлар, балаларды сауықтыру лагерлері жабылады. Карантиннің енгізілуі жөніндегі хабарды тұрғындар оң бағалады. Себебі, соңғы бір айдың өзінде аурудың белең алып, көз жұмғандардың көбейіп кетуі шектеу шараларының жеңілдігінен, дейді ақтөбеліктер. Ал, шағын және орта бизнес өкілдері бұл пікірмен келіспейді. Сағдат Ахметов ерлерге арналған шаштараздың иесі. Қарамағында азды-көпті қызметкерлері бар. Онсыз да соңғы айларда келушілердің жоқтығынан айлықтары азайған "шеберлер", енді мүлдем жұмыстан айырылуы мүмкін, дейді ол. Айсұлу Шаутимова 40 жылдық тәжірибесі бар шаштараз. Қазір өз алдына сұлулық салонын ашып, 5 адамды жұмыспен қамтып отыр. "Карантин енгізіледі" деген хабар оны да қуанта қойған жоқ. Осылайша, алдағы жексенбіден бастап елде карантин тәртібі күшейтіледі. Карантин кезінде дәріханалардың, азық-түлік дүкендерінің, ашық базарлардың жұмысы жалғасады. Дезинфекция ерекше назарда. Қаладағы қоғамдық көлік қозғалысы қандай уақытпен реттелетіні әзір белгісіз.