Елімізде нашақорлықтың алдын алу айлығы басталды. Шара маусым айының соңына дейін жалғасады. Жергілікті полицейлер осыған орай рейдтерді күшейтіп, ашық есік күндері мен флэш-мобтар ұйымдастырмақ. Есірткі пайдаланудың алдын алып, заңсыз айналыммен күресуге білім, денсаулық сақтау мекемелері мен жастар да атсалысуы тиіс. Бүгін ҚР Премьер-министрдің орынбасары Ералы Тоғжановтың қатысуымен айлықтың ашылу кеңесі өтті. Өңірлердегі ведомстволар елордадағы жиынға онлайн қатысты. Нашақорлардың баратын жері түрме, дейді тәртіп сақшылары. Жыл басынан бері өңірде есірткіге қатысты 130 құқықбұзушылық анықталған. 24 келіге жуық есірткі тәркіленді. Дені героин мен марихуана. Тағы бір қауіп синтетикалық есірткінің жастар арасында таралуы. Бұл қатердің алдын алуға білім, денсаулық сақтау ұйымдары атсалысуы тиіс. Әсіресе жастар саясаты басқармалары жасөспірімдер арасында жұмысты күшейтсе жөн. Ералы Тоғжанов өз баяндамасында есірткімен күресте кешенді бағдарламалар керектігін тілге тиек етті. Есірткі сатумен айналысушылар саны ел бойынша 2020-шы жылмен салыстырғанда өткен жылы 10 пайызға дейін артқан, былтыр ұйымдасқан топ та әшкереленген. Полицейлер есірткі шегіп, рульге отыру фактілері жиілегенін айтады. 26-маусым халықаралық есірткі құралдарын пайдалануға және олардың заңсыз айналымына қарсы күрес күні. Бұл шешім 1987 жылы БҰҰ Бас ассамблеясының 42-сессиясында қабылданды. Ал оның қабылдануына хатшының 26-маусымда айтылған есірткі құралдарын теріс пайдалануға және олардың заңсыз айналымына қарсы күрес жөніндегі баяндамасы себеп болған.