Елімізде дизель майының құны қымбаттаған. Айға жуық шаһардағы жанар-жағар май құю бекеттерінде сұйық отын талонмен жіберілуде. Әйткенмен қолма-қол ақшаға құйып беретін бекеттер де бар. Кейбір жүргізушілердің айтуынша, қаладағы бензин құю стансаларында қысқы дизель отынының құны түспей тұр. 279 теңгеден литрі. Бұл аса қымбат баға. Жазғы температураға жарамды дизель отыны- 201 теңге тұрады. Жанар-жағар май құю бекеттерінде соған қарамастан кезек жоқ. Жұлдыз Мейірханова сабақтайды. Күз түскелі облысымызда астық жинау науқаны басталып кетті. Әдеттегідей облыс бойынша астықты Алға, Әйтеке би, Қарғалы, Қобда, Мәртөк, Хромтау аудандарында тонналап астық қамбаға құйылуда. Жасыратыны жоқ, елде егін ору науқаны басталған кезде, яғни, тамыздың басында дизель майы күрт қымбаттап шыға келеді. Қазіргі уақытта жанармай құю бекеттерінде бір литр дизель отынының құны көктемге қарағанда 15-20 теңгеге өсіп, 201 теңгеден саудалануда. Соңғы бір айда тұрақтаған баға жүргізушілерді шошытып отыр. Жазғы дизель отынының бағасы да біраз өскен. Оның үстіне шектеу де бар. Біраз бекеттер арнайы талонмен құяды. "Жығылған үстіне жұдырық" демекші, өзге жанар-жағармай бағасы да көңіл көншітпейді. Қазір таблода АИ-92 маркалы бензиннің литрі 185 теңге мен 186 теңге аралығында белгіленген. Жиі тұтынылатын АИ- 95 187 теңгеден бастап сатылымда. Осылайша, дизель майы бағасының шарықтап шыға келуі ауыр техника жүргізушілерінің жүйкесін жұқартқан. Бүкіл техникасын сайлап, күзгі жиын-терімге дайындалып отырған шаруа қожалықтары осы күні дизельдік отынды қайдан табарын білмей дағдарып отыр. Өйткені қымбат бағаны қалта көтермейді. Айтпақшы қала бойынша "Батыс жер" ЖШС-нің май құю станцияларынан басқа бекеттерде талонсыз дизель майын құю мүмкін емес. Ал жанармайдың бағасын ұстап тұруға министрліктегілердің мүмкіндігі жетпей отыр. Себебі соңғы бес жылдан бері елімізде дизель отыны бағасын мемлекеттік реттеу алынып тасталған. Содан бері жауапты шенеуніктер бағаның шарықтауын нарыққа сілтеп қана отыр. Ал дизель өндіру технологиясы бензинге қарағанда жеңілдеу болғандықтан, құны да сәйкесінше, төменірек болуы тиіс еді.