Ақтөбеліктер қашықтан 218 қой мен 11 ірі қараны құрбандыққа шалды. Ал Qurban2020.kz сайтына жеті жүзден аса мұқтаж адам көмек сұрап, өтініш білдірген. Сондай-ақ, айт күндері 40 мешіт қызметкері мен 60 ерікті жамағаттан құрылған жұмысшы топ халыққа қызмет көрсетті.Биылғы айт мерекесі шіліңгір шілденің соңғы күніне сәйкес келді. Ал құрбан шалушылардың аманатын арқалаған мешіт қызметкерлері үшін басты міндет - еттерді бұзып алмай, мұқтаждарға үлестіру. Бұл үшін облыс әкімдігі арнайы 10 рефрижератор көлігін бөлген. Жұмыс тобы "Айбек" мал сою орнында үш топқа бөлініп қызмет етті. Олар - қасапшылар, еттерді жіліктеушілер және таратушылар. Уәде етілгендей құрбан шалушылардың барлығына бейне есеп жіберіліп, тіпті малдың басы да үйітіліп, етпен бірге үлестірілді.Медицина қызметкерлері мал сою кезінде барлық санитарлық талаптарды қадағалады. Бас имам өз кезегінде барша азаматтарға Қазақстан мұсылмандары діни бірлестігі Ақтөбе өкілдігі атынан алғысын жеткізді. Қала тұрғындарының басым бөлігі қасиетті мерекеде құрбандық шалып, өз отбасында атап өтті. Облыс бойынша 2 278 мұқтаж жанға 11 тонна 397 келі ет таратылды.