"Өз бостандығыңды бағала". Сыбайлас жемқорлыққа қарсы іс-қимыл агенттігі осындай тақырыпта экскурсия жүргізіп жатыр. Мемлекетке қызмет ететін мамандарға абақтыдағы өмір көрсетіледі. Бұл тікенек сыммен қоршалып тұрған қаланың қақ ортасындағы қапас. Жемқорлық жасасаң осы жерден бір шығасың. Әуелі екі айға тұтқындаласың, одан соң қанша отыратының белгісіз. Кінәсіз болсаң, босатады. Мемлекеттің қаражатына қол салсаң немесе мемлекеттік қызметті сатсаң жазаңды алып, қолыңмен істегенді мойныңмен көтеруіңе тура келеді. Бүгін дәрігерлерге осыны түсіндірді. «Өз бостандығыңды бағала!» акциясын қолға алған облыстық сыбайлас жемқорлыққа қарсы іс-қимыл департаменті мен «Ақтөбе - адалдық алаңы» жобалық кеңсесі және облыстық қылмыстық-атқару жүйесі департаменті. Мемлекеттік қызметшілер бас бостандығынан айыру орындарын аралап көреді. Бүгін тергеу қапасына дәрігерлер келді. Темір тордың арғы жағындағы тіршілікті көздерімен көрді. Мұнда қазір 300-ге жуық адам отыр. Мұндай экскурсия 2018 жылы қаңтар айында өткізілген. Ол кезде 40-қа жуық мемлекеттік қызметші қылмыстық - атқару жүйесіне қарасты түзету мекемелеріндегі өмірмен танысқан. Департамент қызметкерлері мұнда жатқандардың тамақ ішетін орны мен демалатын, жататын жерлерін көрсетті. Жазасын өтеушілер мұнда жұмыс жасап, ай сайын 50 мың теңге айлық алады. 5 күн жұмыс, 2 күн демалады. Бұл мекемеде 5 жылға дейін сотталғандар жазасын өтейді. Жемқорлықтың етек жайғаны сонша мемлекеттік қызметкерлерге абақтыдағы өмірді көрсетуден басқа жол қалмады. Экскурсиядан кейін дәрігерлер әсерлерімен бөлісті. Елімізде қазір 2015-2025 жылдарға арналған сыбайлас жемқорлыққа қарсы стратегия жүзеге асырылып жатыр. 2019 жылы облыста 113 жемқорлық қылмысы тіркелген.