Бос жұмыс орындар жәрмеңкесі өтті

Наурыз мерекесі қарсаңында халықты жұмыспен қамту орталығында бос жұмыс орындарының жәрмеңкесі өтті. Жәрмеңкеде 20 - дан астам мекеме 300 бос жұмыс орнын ұсынды. Олар заңгер, есепші, кадр маманы, ағылшын тілі пәнінің мұғалімі, дәнекерлеуші, күзетші сынды мамандықтар.Бүгінде қалалық жұмыспен қамту орталығына 3850 - ге жуық жұмыссыз тіркелген. Қала бойынша электронды еңбек биржасы www.enbek.kz порталында 1776 бос жұмыс орны ашылып, оған 2917 тұрғын өз түйіндемесін жіберген. Жәрмеңкеге жұмыс іздеп келгендерге "Ұлттық жоба" бағдарламасы аясында өтетін белсенді шаралар мен атаулы әлеуметтік көмекті тағайындау жолы түсіндірілді. Сондай - ақ, қалалық жұмыспен қамту орталығында кәсіп ашқысы келетіндерге арнап қайтарымсыз грант байқауы жүріп жатыр. Грант сомасы 1 млн 380 мың теңге. Наурыздың 13 - і мен 17 - і аралығында өткен іріктеуге 500 - ге жуық үміткер өз өтінімдерін жіберіп үлгерген. Үміткерлер қатарында жұмыссыздар, жеке кәсіпкерлер, көпбалалы отбасы мүшелері, мүгедектігі бар адамдар, "қандас" қолданыстағы мәртебесі бар адамдар болуы керек. Айта кетейік, биыл 50 адам қайтарымсыз грант иегері атанса, былтыр 175 адам осындай грантқа қол жеткізді. 
Количество показов: 925
Дата создания: 17.03.2023 11:01:13