Бүгін Өнер орталығы ғимаратында алғаш рет қалалық бос жұмыс орындарының форумы өтті. 50-ден аса жұмыс беруші, 500-ге жуық бос орынды ұсынды. Қала тұрғындары жұмыс берушілермен тікелей сөйлесіп, алдын-ала әңгімелесудан өтіп, түйіндеме қалдырды. Форумды "Атамекен" кәсіпкерлік палатасы және қалалық жұмыспен қамту орталығы бірлесіп ұйымдастырды. Жұмыс берушілер Ақтөбеден ғана емес еліміздің өзге аймақтарынан да жиналған. Олар мастер-кластар өткізіп, түйіндеме жасау, көптің алдында өзін өзі ұстау жөнінде кеңестер берді. Жұмыс іздеп келген тұрғындар көп жиналды. Өздерінің көңіліндегі жұмысты табамыз ба деген ниеттері бар. Олар жұмыс берушілермен тікелей сөйлесіп, түйіндемелерін қалдырды. Жұмыс іздеп жүргендердің арасында атаулы әлеуметтік көмекке құжат тапсырғандар да бар. Соңғы өзгеріске сәйкес олар жұмыс жасауға міндетті. Сол себепті олар өздеріне ыңғайлы жұмыс көзін іздестіріп жүр. Мамандықтары сәйкес келгендері түйіндемелерін тапсырды. Болашағына алаңдаулы студенттер де осында. Оқып жатқан мамандықтары сұранысқа ие ме? Оқу бітірген соң жұмыс табыла ма? Оларды осы сұрақтар мазалайды. Жалғас Телман - Қ. Жұбанов атындағы Ақтөбе өңірлік мемлекеттік университетінің 4 курс студенті. 4 айдан кейін қаржы мамандығын иеленеді. Сол себепті қазірден мамандығына сәйкес жұмыс табуға тырысып жүр. FSSA компаниясының директоры Ермек Ереулиевтің айтуынша семинарға қатысқан азаматтарға тәжірбие жинақтаумен қатар шет елдік компаниялармен жұмыс істеу ерекшеліктері, бірінші тәжірбиенің маңыздылығы кеңірек түсіндірілген. Бұл компания бүкіл әлем азаматтарын жұмысқа орналастырумен айналысады. Осы компания арқылы ақтөбеліктердің "Теңізшевройл", SHELL, TOTAL, NCOC сияқты әлемнің үздік компанияларында жұмыс табуға мүмкіндіктері бар.