"Бекқұл баба-2" ауылының қордаланған мәселелері шешімін таппай келеді. Благодар ауылдық округі құрамындағы елді мекенде 100 отбасы тұрады. Жыл санап ауылға қоныстанушылар қатары көп, дейді тұрғындар. Әйткенмен қала іргесінен 23 шақырым қашықтықта тұратын жұртшылықтың әкімдікке өкпесі қара қазандай. Халық әлеуметтік мәселелер бес жылдан бері шешімін таппай отыр. Қаламен қатынас былай тұрсын, қыста ауылішілік жолдар уақытылы ашылмайтындықтан балаларымызды сабаққа жеткізе алмай қианаламыз дегенді айтады."Бекқұл баба-2" ауылы "Жаман Қарғалы" өзенінің сағасында орналасқан. Облыс орталығынан шамамен 23 шақырым қашықта жатыр. Благодар ауылдық округіне қарайды. Ауылда №76 орта мектептен басқа ешқандай әлеуметтік маңызы бар нысан жоқ. Дәрігерлік амбулатория, дәріхана, тіпті азық-түлік дүкені салынбапты. Жұртшылық азық-түлік алу үшін арнайы қалаға келеді. Ауылдың шұрық тесік жолынан беті қайтқан жүргізушілер тас жолдан кейін бұрылады. Ауылдықтарды қаламен жалғап отырған №49 автобус сағат сайын жүреді. Онда да тек тәулігіне 5 мәрте ғана қатынайды. Қоғамдық көліктен күдер үзген жұртшылық такси қатынасының жолға қойылғанын қалайды. Ауылдың ішіне кіріп қызмет етсе деген тілектерін үлкендер қала әкімінің есебінде сауал ретінде жолдаған. Бірақ сұрақ шешімін таппағанға ұқсайды. Қордаланған мәселелерін құзырлы органдарға "Бекқұл баба-2" ауылының тұрғындары арыз етіп жазып, бірнеше мәрте жеткізген. Қалалық әкімдік атына ұжымдық шағым да түсірген. 100 отбасы тұратын ауылда қоқыс қалдықтары салынатын контейнерлер атымен жоқ. Өзен сағасына қоныстанған ауыл тұрғындары тұрмыстық қалдықтарды бірде өртеп, кейде су арнасына тастай салатын көрінеді. Бұған алаңдаған халық экологияға залал келмей тұрғанда әрекетке көшу керек деп жан айқайларын жеткізді.