Баспанасы өртеніп, үш баласымен далада қалған жалғызбасты ана көмекке зәру. Тургенев көшесі №88-үйдің үшінші қабатындағы пәтер өрті өткен сенбіде орын алды. Үй иесі Гүлзат Қайболдина қазір балаларымен туыстарының үйін паналап отыр. Қара күйеге боялған мына пәтер Тургенев көшесіндегі №88-үйдің үшінші қабатында орналасқан. Жалын тұтанғанда үй иесі Гүлзат Қайболдина балаларымен туыстарының үйінде болған. Себебі, оқиғадан бұрын пәтері суға кетіп, жөндеу жұмыстарын жүргізуге мәжбүр болған. Өрт түнгі 2-лер шамасында тұтанған. Өрт сөндірушілерді көршілері шақырыпты. Осылайша, бір түнде жалғызбасты ана баспанасыз қалды. Үш баланы жалғыз тәрбиелеп отырған әйел жылы ұясын 2019 жылы он жылға ипотекаға алған. Әлі банк алдындағы қарызын толық өтеп үлгермеген ол, енді мына пәтерді күрделі жөндеуден өткізуге жалғыз өзінің шамасы жетпейтінін айтады. Қалалық жұмыспен қамту және әлеуметтік бағдарламалар бөлімінде Гүлзат Қайболдинаға үкімет тарапынан бір реттік ақшалай көмек көрсетілетінін айтты. Ол үшін зардап шегушінің қолында төтенше жағдайлар қызметінің өрт жөніндегі хаттамасы болуы керек. Аталған хаттаманы зардап шегуші қолына он бес күннен кейін ғана алады. Дегенмен, үкіметтен берілетін 100 мың теңге түгелдей жалын шарпыған пәтерді жөндеуге жете қоюы екіталай. Сондықтан, жалғызбасты ана қайырымды ақтөбеліктердің қолдауын сұрап отыр.