Ата-анасымен тіл табыса алмай, балалардың үйінен кету жағдайлары жиілеген. Кешкі мезгілде заңды өкілінсіз көше кезеді, түнгі клубтарды жағалайды. Белі қатпай жатып жұмыс жасап, ақша табуды көздеген жасөспірімдер тағы бар. "Балалар түнгі қалада" жедел алдын алу іс шарасы кезінде осындай деректер анықталуда. Балаларға жазғы демалыс кезінде ересектермен бірдей жұмыс істеуге рұқсат етілмейді. Балалар еңбегі заң шеңберінде қорғалуы тиіс, дейді тәртіп сақшылары. Аяулым жақында 16 жасқа толады. Биыл жазда жұмыс істеп, ата-анасына қолғабыс еткісі келеді екен. Қазір мектеп оқушысы түскі сағат екіден кешкі алтыға дейін ойын алаңында оператор болып жұмыс істеп жүр.
"Балалар түнгі қалада" жедел алдын алу іс-шарасы балалар жылына бағытталған. Қаладағы барлық ойын- сауық орталықтары, көңіл көтеру орындары мен көп қабатты үйлердің жертөлелері мен шатырына дейін бақылауға алынған екен. Соның нәтижесінде балалар ісімен айналысатын инспекторлар жүздеген тәртіп бұзушылықтарды анықтап шыққан.
Жалпы 158 әкімшілік құқықбұзушылықты анықтап, тіркеуге алған полиция инспекторлары жасөспірімдер арасында үйден кетіп қалу деректері көбейіп бара жатқанын айтады. Балаларына іздеу салып, полицияға хабар беретін ата-аналар саны артқан. Ал жасөспірімдер үйінен қашып, көңіл көтеру орындарында уақыт өткізеді. Көп жағдайда ата-аналар да өз міндеттерін толық орындамай, түнгі 12-ден кейін балалардың бақылаусыз көшеде жүруіне жол береді, дейді тексеру жүргізген мамандар.