ҚР Сауда-саттық және интеграция министрі Бақыт Сұлтанов елде азық-түлік бағасының қымбаттауына жергілікті әкімдіктерді кінәлап отыр. Былтыр әлеуметтік маңызы бар азық түрлерінің бағасы 10,4 пайызға өскен. Жыл басталғалы азық-түлік бағасының 0,3 пайызға өскені байқалады. Облыстық кәсіпкерлік басқармасы бүгін бұл мәлімдемеге қатысты жауап берді. Бүгін өткен үкімет отырысында ҚР сауда-саттық және интеграция министрі Бақыт Сұлтановтың мәлімдеуінше, азық-түлік бағасының қымбатшылығына келгенде, өнімділіктің төмендеуі, экспорт секілді сылтауларды былай ысырып қойғанда, жергілікті жерлерде әкімдіктер баға мониторингін белсенді жүргізбейді. Шұғыл шараларды қолға алмайды. Ақтөбе облысында бағаны тұрақтандыру қоры бары белгілі. Қорда халық көп тұтынатын тағамдар сақталған. Азық-түлік қыс-көктем мезгілдерінде коммуналдық базарларға шығарылып тұрады. Тұрақтандыру қорындағы азық-түлік бағасы да арзан. Оған қоса дүкендер желісі, азық-түлік өндірушілермен арада бағаны тұрақтандыруға қатысты келіссөз бар. Сауда-саттық және интеграция министрлігінің дерегінше, былтыр барлық аймақта шекті бағалардың өсуіне қатысты 67 жағдай тіркелген. Бірақ, ол кезде бір де бір әкімдік сауда нысандарына заңмен белгіленген шараларды қолданбаған. Өткен айда да азық-түлікке белгіленген шекті бағаның өскені байқалды. 7 жағдай расталған. Әкімдіктер бұған да назар аудармай отыр. Ақтөбеде әлеуметтік маңызды тағамдар бағасын ұстап тұру бойынша биылға арналған іс-шаралар жоспары бекітілген. Биыл жергілікті өндірушінің "Лето" сұйық майының бағасы литріне 435 теңгеден 20 теңгеге арзандатылған. Жергілікті өндіруші "Айс+" серіктестігінің ірімшік бағасы келісіне 1570 теңгеден 1330 теңгеге төмендетілген. Бұл ай сайынғы штаб отырысының нәтижесі деп көрсетті облыстық кәсіпкерлік басқармасы басшылығы.