Осы айда елімізде бірқатар өзгеріс күшіне енеді. Күздің екінші айында халықаралық әуе рейстері қысқарып, карантин шаралары күшеюі мүмкін. Сонымен қатар, ескі банкноттарды айырбастау мерзімі аяқталады. Осы және өзге де жаңашылдықтар жөнінде толығырақ тілші тарқатады. Ел билігі қазан айынан коронавирустың екінші толқынына жол бермес үшін карантинді күшейтуді жоспарлап отыр. Атап айтқанда, 5 қазаннан бастап басқа елдермен халықаралық әуе рейстері уақытша тоқтатылып, Түркияға рейстер қысқарады. Денсаулық сақтау министрі, сонымен қатар, әуе қатынасы жанданған елдермен рейстерді ұлғайтпауды ұсынды. Бұған қоса, екінші санаттағы елдерден келетін азаматтар үшін міндетті талаптар бекітіледі. Сондай-ақ, мемлекеттік шекараны кесіп өту бекеттерінде карантиндік стационарлар мен тестілеу ұйымдастырылады. Күздің екінші айында тұрғындар ескеруге тиісті тағы бір өзгеріс - темекі сату қиындай түседі. Себебі қазан айынан бастап темекі өнімдерін сатудың жаңа талаптары күшіне енеді. Бұл туралы облыстық мемлекеттік кірістер департаментінің мамандары түсініктеме берді. Қазан айында күшіне енетін тағы бір өзгеріс- ескі банкноттарды айырбастау тоқтайды. Қазақстан Ұлттық банкі Ақтөбе филиалының мамандары 2006- жылғы үлгідегі номиналы 2 000, 5 000 және 10 000 теңгелік банкноттарды айырбастау кезеңі 3- қазанда аяқталатынын мәлімдеді. Сонымен қатар қазан айында шағын және орта бизнес жыл соңына дейін еңбекақы төлеу қорынан бюджеттік емес қорларға аударымдардан босатылады. Бұл республика бойынша шамамен 700 мың салық төлеушіні қамтиды. Қазан айында парламент сайлауының датасы жариялануы мүмкін. Қазіргі шақырылымдағы мәжілістің өкілеттігі 2021 жылдың 24 наурызында аяқталады. Заң бойынша Қазақстан президенті парламент сайлауының өтетін күнін 2020 жылдың 24 қазанынан кешіктірмей белгілеуі тиіс.