Бүгін - Дүниежүзілік азаматтық қорғаныс күні. Облыстық төтенше жағдайлар департаментінің қызметкерлері №64 орта мектепте арнайы-тактикалық оқу-жаттығу өткізді. Мақта мен дәкеден жасалған арнайы байлағыш химиялық-радиациялық апат болған кезде таптырмас қорғаныс құралы. Ең қарапайым әрі қолжетімді дүние құтқарушылар жеткенше түтін мен газға уланудан сақтайды. Дәкеге қалың етіп мақта салынған байлағышты бүгін облыстық төтенше жағдайлар департаментінің қызметкерлері №64 орта мектептің оқушыларына жасатып үйретті. Білім ордасында арнайы-тактикалық оқу-жаттығу өтті. Дүниежүзілік азаматтық қорғаныс күніне байланысты оқушылар мен мектеп қызметкерлері радиациялық-химиялық апат болған жағдайда алғашқы көмек пен қорғану шараларын үйренді. Хлордың ауаға таралуы кезіндегі алғашқы көмек көрсетіліп,балалар кейін мектептен шығарылды. Жаттығуға шаһардағы мектеп директорлары түгел қатысты. Арнайы көрме ұйымдастырылып, білім мекмелерінің басшыларына әр қорғаныс құралы таныстырылды. Көрмеге радиациялық-химиялық бақылау бекетінің улы газдан қорғау құрал-жабдықтары да қойылған. Дүниежүзілік азаматтық қорғаныс күніне арналған шаралар бір ай бойы жалғасады. Облыстық төтенше жағдайлар департаменті мамандарының сөзінше, жергілікті атқарушы органдар, түрлі мекемелердің қызметкерлеріне апат болған жағдайда қорғану тәсілдері үйретіледі. Әр оқу орнында шама келгенше алғашқы көмек құралдары дайын болуы шарт.