Асыл тұқымды жылқы асырау үшін мемлекеттік қолдау жеткіліксіз. Бүгін шаруа қожалық басшылары облыстық кәсіпкерлер палатасында болған басқосуда осы саладағы бірқатар мәселелерді алға тартты. Енді олар өз ұсыныстарын үкіметке жеткізу жолдарын қарастыруда. Асыл тұқымды жылқы асыраушылар жылына бір қамбар ата төліне 20 мың теңге ғана субсидия бөлінетініне наразы. Мардымсыз қаражат ештеңеге жетпейді, шаруашылықтар қып-қызыл шығынға батып отыр дейді қожалық иелері. Биыл жем-шөп қымбат, оның үстіне қыс қатты болатын түрі бар. Сондықтан біраз малдан айырылып қалуымыз мүмкін деп шырылдайды. Жылқы шаруашылығымен айналысатын кәсіпкерлер мәселе облыс көлемінде шешілмейтін болса үкіметтен көмек сұрамақшы.
Шешінген судан тайынбас. Облыстық кәсіпкерлер палатасының табанын тоздырып жүрген асыл тұқымды жылқы шаруашылығымен айналысатын қожалық басшылары субсидия көлемі мөлшермен қанша болуы тиістігін анықтап алғылары келеді. Содан кейін республика бойынша барлық шаруашылық басшылары ауыл шаруашылығы министрлігіне үндеу жолдайды.
Асыл тұқымды жылқы өсіру үшін ерекше бап керек. Ірі-қара арасында түрлі аурулар көбейіп кеткендіктен, ең алдымен мал басын аман алып қалудың өзі үлкен олжа дейді шаруашылық иелері. Екіншіден жылқы малының бабын тауып, баға алатын малшы да тапшы. Мардымсыз айлыққа жылқышы табу қиын. Асыл тұқымды жылқы асыраушы шаруа қожалықтарының мәселері шаш етектен. Қазір облыс аумағында 26 асыл тұқымды мал асыраушы шаруашылық бар. Онда жылқы саны 7 мыңнан асқан.