Асау барақ көшесі тұрғындары орталықтандырылған кәріз жүйесіне қосыла алмай отыр

Қаланың көне бөлігінде орналасқан Асау барақ көшесінің жарты тұрғыны орталықтандырылған кәріз жүйесіне қосыла алмай отыр. Бір қызығы көшенің басындағы 50 үйден басқасы магистралды кәріз құбырына жалғанған. Ал бұл игіліктен кенде қалғандар автономды шұңқырларды тазалату қызметі қалтамызды қағып болды дейді. Өздерін ортақ құбырға қосу өтінішімен тұрғындар құзырлы мекемелердің табалдырығын тоздырған. Әзірге нәтиже жоқ. Асау барақ көшесінің басы тұйықталып кетеді. Яғни, сол тұйық жағында орналасқан 50 шақты үй орталықтандырылған кәріз жүйесіне қосылмаған. Әр үйдің автономды шұңқыры бар. Үй иелері айына кемінде 3 мәрте ассенизатор шақыратындарын айтады. Ал қазір су сору қызметі қымбаттай түсуде. Көше жарықтандырылмаған. Былтыр бұл көшенің бағаналары жаңартылған. Бірақ шамдар әлі орнатылмаған. Жол мәселесі тағы бар. Көктемде көліктер жиі батып қалады екен. Тұрғындар бұл мәселелерді айтып қала, тіпті облыс әкімдігіне жыл сайын жүгінеді. Қалалық әкімдіктен "жоспарға енгіздік" деген жауап та жылда келеді екен. Бірақ ешқандай нәтиже жоқ. Бүгін де "Алматы" аудандық әкімдігі, қалалық тұрғын үй-коммуналдық шаруашылық бөліміне хабарласып көрдік. Ешбірінен мардымды жауап болмады.
Количество показов: 1220
Дата создания: 04.04.2023 12:29:17