Биыл 1-ақпанға дейін елге Армениядан сатып әкелінген көліктерді тіркеу науқаны жалғасып жатыр. Облыстық мамандандырылған халыққа қызмет көрсету орталығында 1-маусымнан бері 82 автокөлік тіркеліп, 300-ден аса адам кеңес алған. Жұмысты жеделдету үшін нотариустар мен аудармашылар жұмылдырылған. Есеп бойынша, Армениядан біздің облысқа 3 мыңнан аса көлік әкелінген. Облыстық ПД бастығы Атығай Арыстанов учаскелік полиция инспекторлары әр көлік иесімен көлікті тіркеу бойынша жеке түсіндіру жұмыстарын жүргізіп жатқанын алға тартты.
Облыстық мамандандырылған халыққа қызмет көрсету орталығында құжаттарды қабылдау жексенбі күні сағат 13.00-ге дейін жүзеге асырылады. Автокөлікті тіркеу кезінде азаматтың жеке басын куәландыратын құжат, алым мен баждарды төлеу туралы құжаттар, мемлекеттік тіркеу үшін - 695 теңге, көлік құралын тіркеу куәлігін беру үшін 3473 теңге, мемлекеттік нөмір бергені үшін 7779 теңге, Армения Республикасында берілген көлікті тіркеу туралы куәлік, Армения Республикасының мемлекеттік тіркеу нөмірлік белгісі, мемлекеттік немесе орыс тіліне аударылған көліктің техникалық паспорты сұратылады. Тек қана елге 1-ші ақпанға дейін әкелінген, рөлі сол жақтағы көлік құралдары тіркеуге алынады. ҚР-да 2020 жылдың 1 ақпанынан кейін әкелінген автомашиналарды, сондай-ақ Арменияның уәкілетті органы тіркеу құжаттарында иесі ретінде көрсетілмеген тұлғаларды тіркеуге жол берілмейді.