Қарғалы, Заречный ауылына апаратын айналма жол көктем шыға жөнделетін болды. Ал алдағы аптада асфальты ретке келтіріледі. Әйтпесе әбден тозған жолмен жүру мүмкін болмай қалған еді. Оған қоса бағдаршам да істен шығып, жүргізушілер сағаттап кептелісте тұруға мәжбүр. Жолдың жайы Аида Кәдіржанқызының репортажында.
Мынау былтыр жазда бір емес, екі мәрте жөнделген жолдың сиқы. Шұрық тесік асфальт қатынасқа кедергі келтіргенімен қоймай, көліктерді зақымдайды. Бұған дейін осы айналма жолдағы бағдаршам да жұмыс жасамай тұрған болатын. Бүгін ғана қосылған.
Жазда бұл жолды жөндеумен "Болашақ Гарант Сервис" компаниясы айналысқаны белгілі болды. Мердігер сапасыз төсеген асфальтты өз қаржысына қайта салуға міндеттелген. Жолды қалыпқа келтіруге олар келесі аптада кіріседі.