Қант бағасы қымбаттап барады. Қаладағы ең арзан қант саудалайтын ірі сауда желісінің өзінде шекер бағасы бір аптада 30 теңгеге қымбаттап кеткен. Сөрелерге шығарылған қант лезде сатылып кетеді. Тұрғындар қаладағы қант тапшылығы мен өнімнің бағасының шарықтап бара жатқанына наразы. Ақтөбеліктер әлі де 3 келі қант алу үшін сағаттап ұзын-сонар кезекте тұрады. Бүгінгі көрініс те дәл сондай. Гипермаркетке таңертеңмен келіп алған жұрт қанттың қоймадан шығар сәтін күтіп кезекте тұрды. Дүкен әкімшісінің айтуынша, бүгін қоймаға 8 тонна қант жеткізілген. Оның тең жартысы бүгін, қалғаны ертең саудаланады. Қант келісінің бағасы 473 теңге. Облыстық кәсіпкерлік басқармасының басшысы Нұрхан Тілеумұратовтың айтуынша, өткен айда өңірге 4 мың тоннадан астам қант жеткізілді. Қазіргі таңда оның жартысы сатылымға шығарылған. Жуырда Беларусь, Үндістан және Бразилия мемлекеттерінен тағы да бірнеше тонна шекер жеткізілуі күтілуде. Басқарма басшысы Ресей мемлекетінен қант экспортына шектеу барын жасырмады. Сондықтан, қолдағы бар қант қоры үнемделіп отырса керек.