Қаламызда жол құрылысы мен көшелерді абаттандыру жалғасып жатыр. Облыс басшысы Оңдасын Оразалин және қала әкімі Асхат Шахаров бүгін осы жұмыстардың жүргізілу барысын бақылап көрді. 8 нысанды аралады. Биыл "Нұр Ақтөбе" ауданында өрт сөндіру кешені бой көтереді. Жаңа өрт сөндіру нысаны Рауан және Қызылжар ауылдарына жақын орналасқан. Бұдан былай осы аумақта төтенше жағдай бола қалса, құтқарушылар жандарынан табылады. Өрт сөндіру кешені су жаңа 33 техникамен қамтамасыз етіледі. Қаржы жергілікті бюджеттен жаратылады. Айта кету керек жоба құрылысына ""Бабәк-Құрылыс" серікестігі жауапты. "Ақтөбе- Сәулет" ЖШС-і "Нұр Ақтөбенің" 3-ші шағын ауданда салып жатқан №36, 37-ші көп қатарлы тұрғын үйлерді жылдың соңына дейін тапсырады. Осы айда "Нұр Ақтөбенің" 1-шағын ауданында гүлзар құрылысы басталады. Аймақта 15 000 шаршы метрге жуық жаяу жүргіншілер жолы пайда болады. Жоба құны 170 миллион теңге. Сондай-ақ, биыл "Жаңақоныс" ауылында екі көшені күрделі жөндеу жұмыстары басталды. Асфальттың бірінші қабаты төселген. Қалған жұмыстар келесі жылға ауысады. Айта кету керек, жөндеу жұмыстарына барлығы 254 млн теңге бөлінді. Қаланың қақ ортасымен өтіп жатқан Сазды өзененің жағдайы мүшкіл. Табанына қамыс қаптап, күл-қоқысқа толған. Қалдық су борсып жатыр. Осы айда арнасын ашып, табанын тазарту жұмыстары қолға алынды. Төлеу Алдияров көшесіндегі көп қатарлы №6 үйдің ауласын жөндеу жұмыстары аяқталуға жақын. Ескі жиектастар ауыстырылып, асфальт төселеді. Асфальт жабындысының қалыңдығы 5 см. Облыс әкімі Оңдасын Оразалин "Ахтанов" гүлзарын аралап шықты. Аймақ басшысы 4 көшенің бойында созылып жатқан демалыс орнының құрылысына мән берді. Демалыс орнын абаттандыруға бөлініп отырған қаржы 68 миллион теңге. 5 мың метрге созылып жатқан аумаққа кеспе тастар төселіп, заманауи жарық шамдар мен орындықтар орнатылады. Гүлзарды жаңғырту жұмыстары "АЭМК Жарық" серіктестігіне тапсырылған. Шернияз көшесіндегі тротуарлар мен баспалдақтар қайта жаңартылуда. Сондай-ақ, Алтынсарин көшесі бойында Т.Ахтанов атындағы облыстық драма театрының жанындағы гүл бағына да жөндеу жұмыстары жасалады. Алдағы екі жылда шаһарда шағын гүлзарлар мен саябақтар саны екі есе артпақ. Құрылыс жұмыстары қыс түскенше созылады.