Қаладағы барлық сұлулық, гүл салондары мен тігін шеберханалары ертеңнен бастап жұмыс уақытын қысқартады. Кейбірі жұмысшыларының келісімімен 16-шы сәуірге дейін уақытша жабылады. Облыс әкімдігінің қаулысына сәйкес, жұртшылық көп шоғырланатын орындар жұмыс уақытын шектеуі тиіс. Қаулыны орындау мақсатында шаһардағы мұндай нысандар есіктеріне хабарландыру іле бастаған. Ағайынды Жұбановтар көшесінде қаз қатар орналасқан сұлулық салондары мен шаштараздар, көзілдірік сататын нысандар бүгін әдеттегідей жұмыс істеп жатыр. Тек бір ғана ателье әлдеқашан жұмысын тоқтатқан. Жергілікті әкімдік қаулысына сәйкес, нысандар ертеңнен бастап жұмыс уақытын шектемек. Мына ғимараттың иесі жұмысшыларын 15 күнге ақысыз демалысқа жіберген. Шектеу гүл салондарына да қойылады. Гүл сататын дүкендер ертеңнен бастап онлайн режимде жұмыс істеуі тиіс. Яғни, гүлдерді қызметкерлер тапсырыспен үйге жеткізіп береді. Елімізде індеттің етек алуына байланысты шектеулер енгізіліп жатыр. Ертең түнгі 12-ден бастап облыс аумағына бей-берекетсіз кіріп шығуға қатаң тыйым салынады. Моншалар жабылып, мейрамхана, дәмханалардың кешкі мезгілде жұмыс жасауына рұқсат жоқ. Республикада төтенше жағдай режимі 16-шы сәуірге дейін күшінде. Қажет жағдайда мерзім ұзартылуы мүмкін.