Кеше таңда Локомотивная көшесіндегі 8 пәтерлі үй өртке оранды. Шатырдан басталған қызыл жалын 400 шаршы метр аумақты алып кеткен. Оқиға орнына жеткен өрт сөндіру қызметі тілсіз жауды 2 сағатта сөндірді. Абырой болғанда қаза тапқандар жоқ. Өрттің шығу себебі анықталуда.
Тілсіз жау жексенбіде шырт ұйқыда жатқан тұрғындарды баспанасынан айырды. Түгі қалмай жанып кеткен мына үйде екі балалы жас отбасы тұрды. Олар Арал қаласынан биыл көшіп келген. Екі баласы бар. Бірі мүгедек. Айтуларынша, соның емімен Ақтөбеге көшуге мәжбүр болған. Пәтердің ақысын толық өтеп бітірмеген олардың баспанасымен бірге баланың еміне жинаған азын аулақ қаражаты да күлге айналған. Аралгүл Аралбайқызы секілді тағы 3 отбасы панасыз қалды. Бәрінің де бала-шағасы бар. Төрт баласымен далада қалған тағы бір тұрғын Юлия Михно. "Бәрі әп сәтте болды, тек төлқұжаттарды алып, балаларды шығарып үлгердік", деген ол көз жасына ерік берді. Уақытша қаладағы жатақханалардың біріне орналастырылған тұрғындар бұл осы үйде орын алып отырған алғашқы жағдай емес екенін айтады. Осыдан 6 жыл бұрын дәл осы 8 пәтер түгелдей өртеніп кеткен. Одан кейін тұрғындар өз қаржыларына баспаналарын қалпына келтірген. Енді міне тағы да күлі көкке ұшып отыр. Абырой болғанда адамдар дін-аман. Облыстық төтенше жағдайлар департаменті мамандары өрттің шығу себебін анықтауға кірісті. Облыстың төтенше жағдайлар департаментінен хабарлағандай, бұл бір тәулік ішінде тіркеліп отырған жалғыз жағдай емес. Кеше кешкі сағат тоғыз шамасында Қурайлы ауылында құрғақ шөп пен орман ағаштары жанып кеткен. Оқиға орнына барған 35 қызметкер 6 бірлік техника көмегімен тілсіз жаумен 2 сағаттан астам уақыт күрескен. Алдын ала болжам бойынша 25 гектар жер өртенген. Зардап шеккендер жоқ. Атап өтейік, жалпы жыл басынан бері облыс аумағында 418 өрт оқиғасы тіркелген. Тілсіз жаудан 3 адам қаза тапты.