Елдегі көлік өткізу қақпалары әуеден бақылана бастады. Төтенше жағдай кезінде қырағылықты күшейту мақсатында Қорғаныс министрлігі осындай шешім қабылдаған. Әскерилер блокпосттарды әуеден барлау үшін ұшқышсыз басқарылатын аппараттар қолдануда. Ал біздің қаланың шекараларында 7 көлік өткізу бекеті жұмыс істеп тұр. Блокпост қызметкерлері төтенше жағдай аяқталмайынша осында. Жол бойында кезекпен күзетке тұратын полиция қызметкерлері мына вагонның ішінде ұйқысын қандырып, тамақтанады. Қару-жарақ сақтайтын бөлігі де бар. Әскерилер де арасында демалып, ауқаттанып, әл жинап алу үшін шатырларын тігіп қойған. Блокпостқа бүгін электр жарығы өткізіліп жатыр. Азық-түлік, ауыз су жеткізіліп тұрады. Полиция мен әскерилерден бөлек бұл жерге санитар-эпидемиологтар, медицина қызметкерлері мен қалалық әкімдік өкілдері тартылған. Эпидемиологтар қалаға кіріп-шыққан көліктерді зарарсыздандырады. Жүргізушілер мен жолаушылардың дене температурасы міндетті түрде тексеріледі. Бұл жұмысты атқаруға еріктілер тартылған. Медицина университетінің резиденттері осы жерде тегін жұмыс жасап жүр. Түннен бері жолда күдікті ешкім анықталмаған. Бірақ, себепсіз жолға шығып, кері қайтарылғандар бар. Көлік жүргізушілері блокпосттан өту үшін қалалық әкімдік өкілдерінен жолдама алуы тиіс. Ол үшін жолға не себепті шыққанын дәлелдейтін құжаттары болуы шарт. Өздерінің, тауарларының ілеспе құжаттары түгел, дұрыс болса, транзиттік жүк көліктеріне әрлі-берлі қатынауға рұқсат бар. Сондай-ақ, азық-түлік, дәрі-дәрмек, медициналық мақсаттағы бұйымдар тасушы көліктер өткізіледі. Облыстың өнеркәсіптік, ауылшаруашылық кәсіпорындарының үзіліссіз жұмыс істеуін қамтамасыз етуге арналған тауарлар, материалдар тасымалданады. Талапқа сай, көлікпен жолға шыққан адамдар міндетті түрде медициналық маска, қолғаптар, антисептикалық құралдармен қарулануы тиіс. Қалаға кірген және қаладан шыққан адамдардың тізімі жасалып отыр. Бізде 7 блокпост жасақталған. Олар Белагорка, Құршасай, Қурайлы, Алға, Орск , "Солтүстік айналма жол", "Ақтөбе-Болгарка-Шұбарқұдық" бағыттарында күні-түні жұмыс жасайды.