Қаламыздың 20 көшесінде жол жөндеу жұмыстары толығымен аяқталды. Жоспар бойынша жыл соңына дейін 97 көшенің жолы түбегейлі жаңартылуы тиіс. Бұл туралы бүгін өңірлік коммуникациялар қызметінде өткен брифингте облыстық жолаушылар көлігі және автомобиль жолдары басқармасының басшысы Мәлімбет Ибрашов мәлімдеді.
Облыс орталығында жол жөндеу жұмыстары қарқынды жүріп жатыр. Бүгінде қаладағы 60 шақырым жолдың жөндеу жұмыстары толықтай аяқталып, қолданысқа берілді. Жыл соңына дейін тағы 77 көшеге жаңадан асфальт жабыны төселеді. Бұл мақсаттарға "Жұмыспен қамтудың жол картасы" аясында 14 млрд теңге қаржы бөлінген. Жөндеу жұмыстары, сондай-ақ, жергілікті және республикалық маңызы бар тас жолдарда да жүріп жатыр. Басқарма басшысының мәліметінше, биыл жергілікті маңызы бар тас жолдарды жөндеу үшін республикалық бюджеттен 40 млрд теңге қаржы қарастырылған. Қазіргі таңда оның 40 пайызы игерілді. Жөндеу жұмыстары қазан-қараша айларында толығымен аяқталады. Өңірдегі республикалық маңызы бар тас жолдардың жалпы ұзындығы 1869 шақырымды құрайды. Оның ішінде Ақтөбе-Атырау-Астрахань жолына қазіргі таңда қайта жаңарту жұмыстары жүргізіліп жатыр. Ал, Самара-Шымкент тас жолы орташа жөндеуден өтуде. Спикерлер, сондай-ақ, Ақтөбе-Қандыағаш тас жолының шешілмеген мәселесіне тоқталды. Олардың айтуынша, аталмыш жол бөлігін жөндеуден өткізу үшін ағымдағы жылдың басында Қазақстандық және шетелдік компаниялар арасында тендер өткізіліп, оны Қытайлық компания жеңіп алған. Алайда, пандемияға байланысты компания қызметкерлері Қазақстанға келе алмай, жұмыстар тоқтатылған. Енді, тендер қазақстандық компаниялар арасында қайта өткізілмек. Осылайша, жыл соңына дейін Ақтөбе-Қандыағаш тас жолында жөндеу жұмыстары басталып, ол үш жылға созылады деп жоспарлануда. Ол үшін 70 млрд теңге бюджет қаражаты қарастырылған.