Дәріханалардағы дәріні үйге тасымаңыз! Қалабасы Асхат Шахаров жерлестеріне бүгін осындай кеңес берді. Әкім ескі қала мен Есет батыр көшесінің бойындағы дәріханаларды аралап шығып, ем-дом шараларына қатысты барлық жәйттермен танысты. Тұрғындармен тілдесті. Қалада дәрі жетіспеушілігі төңірегіндегі туындап жатқан ахуал туралы ойын білдірді. Дәрі неге жетіспей жатыр? Дәріханаларға күніге 300-400 данадан түсетін жоғары сұраныстағы дәрілер алты сағатқа жетпей өтіп кетіп жатыр. Дәл қазір күн тәртібінде тұрған жағдайды тілшілер қауымымен бірге саралап өткен қалабасы бірнеше дәріханалар иесіне қатаң тапсырма берді. Рецептсіз дәріні жаппай сатып алып жатқан жерлестерінің әрекетін сынға алды. Қала әкімінің сұрақтарына жауап берген дәріхана өкілдері күн сайын дәрі үздіксіз түсіп тұрғанын жеткізді. Мәселен, "Миллениумнің" өзіне кеше кешкілік екі мыңға жуық "парацетамо́л" түскен. Мыңға жуық "цефазолин" мен "ципролет" әкелінген. Бірақ аталған дәрілер тәулікке жетпей сөреден жоғалды.
"Айболит" дәріханалар желісінде де осы жағдай. Дәріхана меңгерушісі Ләззат Ізбасарованың айтуынша, рецептте көрсетілген дәрілер болмаса, оны алмастыратын препараттар тұрғындарға сатылып жатыр. Бірақ, ақтөбеліктердің сұранысына ие ыстық түсіруші "парацетамол" бұл жерде де болмай шықты. Дәріханадағы күнделікті көрініспен танысып шыққан Асхат Шахаров дәрілер айналасындағы дүрбелеңді қолдан жасалған деп атады. Тұрғындар тарапынан мұндай әрекет жалғаса берсе, нағыз дәріге мұқтаж науқастар зардап шегетін болады деді. Қалабасы фармацевтерге қолында емдеуші дәрігерінің мөрі басылған арнайы рецепті жоқ адамдарға әсері мықты антибиотиктерді сатпауды қатаң ескертті. Міндетті түрде тексеру жүргізіледі. Айта кетелік, өңірге апта соңына “парацетамолдың” қажетті мөлшері жеткізілмек. Денсаулық сақтау министрлігі коронавирус инфекциясын жұқтырған науқастарды емдеу үшін бөлген 138 млн теңгеге сатып алынған 59 дәрінің кейбір түрлері де әкелінеді. dari.kz сайты арқылы аймақ бойынша осы дәрілердің тізімімен таныс болуға мүмкіндік бар. Бірақ дәл қазір сайт жұмыс жасап тұрған жоқ. Денсаулық сақтау вице- министрі Людмила Бұйрабекова тұрғындарды антибиотикті дәрігердің нұсқауынсыз ішпеуге шақырды. Айтуынша, мұндай дәрілерді себепсіз ішу бактериялардың төзімділігін арттырып, аурудың күшеюіне әкелуі мүмкін.